O‘zbekistonda 2024-yilning birinchi yarmida 550 mlrd so‘mdan ortiq elektr energiyasi va tabiiy gazdan noqonuniy foydalanilgani aniqlandi. Bu haqda “O‘zenergoinspeksiya” matbuot xizmati rahbari Navro‘z Norboboyev ma’lum qildi.
Qayd etilishicha, nazorat tadbirlarida 4 537 ta isteʼmolchi tomonidan tabiiy gaz va elektr energiyasidan noqonuniy va qoidabuzarlik holatlari aniqlandi. 163,3 million metr kub tabiiy gaz va 220,7 million kilovatt-soat elektr energiyasidan noqonuniy foydalanilishi natijasida davlat manfaatlariga jami 550 milliard 290 million so‘m zarar yetkazilgan.
Xususan, 89 ta AGTKSH, 94 ta issiqxona, 94 ta tekstil korxona va 2 ta ohak ishlab chiqarish sexlari faoliyatida noqonuniy va qoidabuzarlik holatlari aniqlandi.
Shuningdek, kripto-aktiv va mayning faoliyati bo‘yicha elektr energiyasidan noqonuniy foydalangan isteʼmolchilarni aniqlash yuzasidan o‘tkazilgan nazorat tadbirlarida 75 ta holat aniqlandi. Ushbu aniqlangan holatlar yuzasidan elektr taʼminoti korxonasi tomonidan jami 81 milliard 604 million so‘m (15 million 909 ming kilovatt-soat) miqdori qayta hisob-kitob qilindi.
Isteʼmolchilar tomonidan energiya resurslaridan foydalanish qoidalarini buzish bilan bog‘liq huquqbuzarliklar bo‘yicha 3382 ta maʼmuriy ish rasmiylashtirildi.
O‘tkazilgan nazorat tabirlarida aniqlangan holatlarning 1904 tasi elektr energiyasi, 1478 tasi esa tabiiy gazdan foydalanishda qoidabuzarlikka yo‘l qo‘yilgani maʼlum bo‘ldi.
Inspeksiyaning nazorat-kimyo laboratoriyalari tomonidan neft mahsulotlari bo‘yicha olib borilgan sifat nazorati tadbirlari davomida AYQSH va korxonalardan olingan tahlil naʼmunalaridan 91 ta holatda 3 million 789 ming litr neft mahsuloti sifatsizligi aniqlanib, sotuvga chiqarilishi oldi olindi.
Izoh (0)