Наманганда газ тармоғига ўзбошимчалик билан уланиб, давлатга 1,4 миллиард сўм зарар етказган фуқарога нисбатан жиноят иши қўзғатилди. Бу ҳақда “Дарё” мухбири Азизбек Абдувалиев хабар бермоқда.
Қайд этилишича, Янгиқўрғон туманида истиқомат қилувчи фуқаро хусусий боғи ҳудудидан ўтган ва корхоналардан бирига тортилган табиий газ тармоғига ҳисоблагичдан ташқари уланиб олиб, 8 ой давомида фойдаланиб келган. Ушбу ҳаракатлар билан туман газ таъминоти бўлимига 1,4 миллиард сўмдан зиёд зарар етказилган.
Ҳозирда хусусий боғ эгасига нисбатан жиноят иши қўзғатилган бўлиб, тергов ҳаракатлари олиб борилмоқда.
Косонсой туман газ таъминоти бўлими ходими томонидан тумандаги фуқаролардан бирининг иккита яшаш хонадонига газ тармоғини улаб бериш эвазига 400 доллар, 2 та газ ҳисоблагичини ўрнатиб бериш учун эса 3,5 миллион сўм талаб қилган. Департаментнинг туман бўлими билан ҳамкорликда ўтказилган тезкор тадбир давомида ходим келишилган пулларни фуқародан олаётган пайтда ашёвий далиллар билан ушланди. Ҳозирда газ таъминоти бўлими ходимига нисбатан жиноят иши қўзғатиш масаласи кўриб чиқилмоқда.
Изоҳ (0)