АҚШ Халқаро тараққиёт агентлигининг фаолияти (USAID) 1 июль куни расман тугатилди. Президент Дональд Трамп ўзининг иккинчи президентлик даврида агентликни исрофгарчиликка йўл қўйганликда айблаб, уни аста-секин тугатаётган эди. Бу ҳақда BBC хабар берди.
Март ойи ҳолатига кўра, агентлик дастурларининг 80 фоиздан ортиғи бекор қилинганди. Ҳукумат 1 июль куни ташкилотнинг қолган фаолиятига бутунлай чек қўйган. Дунёдаги энг йирик таъминотчи бўлган USAIDʼнинг ёпилиши собиқ президентлар Барак Обама ва Жорж Буш томонидан кескин қораланган.
“USAIDʼни тугатиш — хиёнат ва фожиа. Агентлик дунёнинг кўп нуқталарида жуда муҳим фаолият билан шуғулланади”, деди Обама.
Агентлик ёрдамининг қисқартирилиши 2030 йилга бориб 14 миллиондан ортиқ одамнинг ҳалок бўлишига олиб келиши ҳақида хабар берилганди. Бу борада нуфузли Lancet тиббиёт журналида огоҳлантириш сифатида мақола эълон қилинган. Унга кўра, эрта ўлим хавфи остида бўлганларнинг учдан бир қисми болалар экани тахмин қилинган. Ҳукумат расмийсининг айтишича, тадқиқотда “нотўғри тахминлар” мавжуд ва АҚШ ёрдамни “самаралироқ” тарзда кўрсатишда давом этади.
1961 йилда ташкил этилган USAID 10 мингга яқин кишини иш билан таъминлаганди. Уларнинг учдан икки қисми хорижда фаолият юритган. Трамп ўз президентлигининг иккинчи муддатида Илон Маскка федерал ишчи кучини қисқартириш вазифасини топширган. Шу билан агентликнинг ҳам фаолияти аста-секин қисқариб борган. Бу ҳаракат бутун дунёдаги гуманитар ташкилотлар томонидан қораланган.
Агентликнинг тўхтатилган фаолиятлари орасида Украинада яраланганларга протез оёқ-қўллар етказиб бериш, ҳудудларни миналардан тозалаш ва Африкада Эбола тарқалишини тўхтатиш дастурлари ҳам бор эди. USAIDʼнинг веб-сайтида 2 июль куни агентликниг бутун дунёдаги ходимлари 23 февралдан бошлаб “маъмурий таътил”га чиқарилгани ҳақида хабар берилган.
АҚШ давлат котиби Марко Рубио қисқартиришлардан кейин қолган 1000 та дастур унинг департаментига бириктирилганини маълум қилганди.
“Ҳукумат томонидан рухсат этилган бу самарасизлик даври расман тугади. Трамп маъмурияти даврида биз ниҳоят Америкада миллий манфаатларимизни биринчи ўринга қўядиган хорижий молиялаштириш миссиясига асос соламиз”, деган у.
Изоҳ (0)