USAID Ўзбекистонда дори воситалари сифати ва хавфсизлигини ошириш бўйича ҳамкорлик қилади, деб хабар бермоқда АҚШнинг Ўзбекистондаги элчихонаси матбуот хизмати.
Ўзбекистон—АҚШ тарихида илк бор Тошкентда бўлиб ўтган “Соғлиқни сақлаш соҳасидаги форум” доирасида USAID нинг Ўзбекистондаги ваколатхонаси раҳбари Девид Хоффман ва Соғлиқни сақлаш вазири Амрилло Иноятов Ўзбекистонда дори воситалари сифатини яхшилаш ва фармацевтика тармоғи ривожланишини қўллаб-қувватлаш мақсадида, USAID ва Соғлиқни сақлаш вазирлиги ҳузуридаги Фармацевтика маҳсулотлари хавфсизлиги маркази ўртасида англашув меморандумини имзолади.
АҚШ Фармакопияси томонидан амалга оширилаётган “Сифатли дори воситаларини тарғиб қилиш плюс” дастури орқали, USAID Ўзбекистондаги миллий манфаатдор томонлар ва ҳамкорлар билан дори воситалари сифатини таъминлаш тизимини барқарор мустаҳкамлаш ҳамда Ўзбекистон фуқароларининг сифати кафолатланган муҳим дори воситалари ва тиббий буюмлардан фойдаланиш имкониятларини яхшилаш мақсадида, яқиндан ҳамкорлик қилади.
“Ўзбекистон билан ҳамкорлигимиз узоқ тарихга эга. Биз соғлиқни сақлаш соҳасида нафақат бугунги кундаги муаммолар, балки келажакда юзага келиши мумкин бўлган хавф-хатарларга қарши курашиш борасида ҳам ҳамкорлик қиляпмиз. Ўзаро алоқаларимиз фармацевтика, лаборатория тадқиқотлари, кадрлар тайёрлаш каби кўплаб йўналишларни ўз ичига олади”, — деган АҚШнинг Ўзбекистондаги фавқулодда ва мухтор элчиси Жонатан Хеник.
USAID нинг Ўзбекистондаги раҳбари Девид Хофман “Дори воситалари сифатини рағбатлантириш” дастурини амалга оширалаётганини, USAID нинг техник кўмагида Ўзбекистон дори воситаларини ЖССТ рўйхатидан муваффақиятли ўтказганини қайд этган.
Унинг таъкидлашича, силга қарши курашиш ва фармацевтика — Ўзбекистон билан ҳамкорликнинг асосий йўналишларидан.
Изоҳ (0)