АҚШ Халқаро тараққиёт агентлиги (USAID’нинг «Марказий Осиёда рақобатбардошлик, савдо ва иш ўринларини ташкил этиш» лойиҳаси) томонидан «Ўсиш истиқболлари: савдо, транспорт ҳамда мева-сабзавот ишлаб-чиқариш сектори» номли еттинчи Марказий Осиё савдо форуми ўтказилади. Бу ҳақда АҚШнинг Ўзбекистондаги элчихонаси матбуот хизмати хабар берди.
Компаниялар ва экспортчилар учун энг йирик халқаро тадбир ҳисобланган ушбу форум 2017 йилнинг 18—19 октябрида Қозоғистоннинг Олмаота шаҳридаги Rixos меҳмонхонасида бўлиб ўтади.
Унда Марказий Осиё, Осиё ва Европанинг 500 дан ортиқ делегатлари, компаниялар бошлиқлари, давлат сектори вакиллари ва соҳа экспертлари иштирок этиши кутилмоқда. Икки кун давом этадиган ушбу савдо форуми бу йил, жаҳон савдо бозорида рақобатбардош ўринларни мустаҳкамлаш ва ҳудудда янги иш ўринларини яратиш мақсадида мева-сабзавот ишлаб-чиқариш ҳамда транспорт ва логистика секторларидаги компанияларнинг рақобатбардошлигини оширишга кўмаклашади.
Бўлиб ўтадиган мажлисларда мева-сабзавот маҳсулотларини бозорга чиқариш харажатларининг камайишига кўмаклашадиган янги бозор талаблари ва инновациялари кўриб чиқилади. Алоҳида ўтказиладиган мутахассислар мажлиси янги технологияларни тадбиқ этишга, шунингдек, қишлоқ хўжалигида дронларни, контейнерларга босиладиган электрон муҳрларни, қуёш энергиясидан фойдаланадиган ускуналарни, ҳамда чегараларни бошқариш бўйича божхоналарга мўлжалланган телекамераларни қўллашга бағишланади.
Савдо форуми доирасида кўргазма ташкил қилиниб, унда ишлаб-чиқариш ва транспорт харажатларини камайтириш мақсадида мева-сабзавот ишлаб-чиқариш, транспорт ва логистика секторларидаги янги технологиялар, ускуналар ва хизматлар тақдим қилинади. Биз, халқаро меъёр талаблари, амалий чора-табдирлар ва зарур асбобларни тадбиқ қилиш бўйича эскпорт масалаларига йўналтирилган маҳорат дарсларини ўтказиш орқали кичик ва ўрта бизнесга амалий ёрдам кўрсатамиз.
Бутун ҳудудда ва унинг ташқарисида машҳур бўлган ушбу Марказий Осиё савдо форумининг 6 йиллик фаолияти давомида 25 дан ортиқ мамлакатлардан келган 4 000 дан ошиқ давлат ва хусусий секторлар вакиллари ва соҳа экспертлари қатнашишди. Ўтган йилларда ўтказилган форумлар савдо масалалари билан боғлиқ муаммоларнинг янада яхши тушунилишига ва ҳудудда савдонинг ривожланишига имкон яратди.
USAID’нинг «Марказий Осиёда рақобатбардошлик, савдо ва иш ўринларини ташкил этиш» лойиҳаси Марказий Осиёнинг бешта мамлакатида экспорт салоҳиятини ривожлантириш ҳамда мева-сабзавот ишлаб-чиқариш, транспорт ва логистика секторларида иш ўринларини яратишга йўналтирилган. Ҳудудда компанияларнинг рақобатбардошлигини ривожлантириш ва савдо соҳасидаги тўсиқларни бартараф этиш орқали, USAID агентлиги хусусий секторнинг барқарорлашувига ва рақобатбардошлиги ошишига кўмаклашади.
Изоҳ (0)