Ташқи савдо вазирлигида АҚШнинг Халқаро тараққиёт агентлиги (USAID) вакиллари иштирокида учрашув бўлиб ўтди. Бу ҳақда вазирлик матбуот хизмати хабар берди.
Учрашувда Ўзбекистоннинг Жаҳон савдо ташкилотига қўшилиши билан боғлиқ масалалар муҳокама қилинди.
Музокаралар чоғида USAID Марказий Осиёда рақобатбардошлилик, савдо ва иш ўринлари яратиш лойиҳаси доирасида ушбу жараённинг бошланғич босқичида Ўзбекистон ҳукуматига ҳар томонлама ёрдам беришга тайёр эканини қайд этди.
Мулоқот чоғида USAID вакиллари мамлакат ЖСТ аъзоси бўлишининг муҳим шарти сифатида янгиланган ташқи савдо меморандумини ишлаб чиқишни таклиф қилди.
Мазкур ҳужжат Ўзбекистондаги сиёсий, иқтисодий ва ҳуқуқий масалаларга тааллуқли мавжуд вазиятни тўлиғича ўзида акс эттириши сабаб муҳим аҳамиятга эга ҳисобланади.
Шунингдек, USAID Ўзбекистонга техник кўмак беришни ҳам режалаштирган. Гап ўзининг маслаҳатлари билан бир неча давлатга ЖСТ аъзолари бўлишга ёрдам берган Ёван Екич раҳбарлигидаги экспертларни жараёнга жалб этиш ҳақида бормоқда.
Изоҳ (0)