АҚШнинг Ўзбекистондаги элчиси Дениел Розенблюм Сув хўжалиги вазири Шавкат Ҳамроев билан биргаликда Бухоро вилоятидаги Ёмонжар ирригация тизимини янгилашга бағишланган виртуал тадбирни Тошкентда очиб берди. Бу ҳақда «Gazeta.uz» хабар берган.
Қайта тиклаш ишлари Марказий Осиё минтақавий экология маркази (МОМЕМ) амалга ошираётган «Сув, таълим ва ҳамкорлик»(Smart Waters) лойиҳаси доирасида АҚШнинг Халқаро тараққиёт агентлиги (USAID) томонидан молиялаштирилган.
Ёмонжар Ўзбекистоннинг энг қурғоқчил ҳудудларидан бири бўлиб, у Ўзбекистон–Туркманистон чегарасида жойлашган суғориш каналидир. Гидропостлар ва ўлчаш ускуналарининг мавжуд эмаслиги сабабли фермерлар ўртасида сув тақсимотининг мувофиқлаштирилмаганлиги ҳудуддаги асосий муаммо эди. 1978 йилда қурилган канал Ўзбекистоннинг Бухоро вилояти Қоракўл ва Олот туманларидаги 8000 гектар ерни суғориш учун асосий канал – Аму-Бухородаги сувни йўналтиради, унинг умумий узунлиги 32,5 километр бўлиб, қарийб 34 минг кишига хизмат қилади. Ушбу каналда сув ресурсларини бошқаришни такомиллаштириш мақсадида ташкил этилган қайта тиклаш ишлари тўсиқ иншооти, гидропостни қуриш, сув чиқариш жойларини реконструкция қилиш ҳамда канал ўзанини бетонлаштиришни ўз ичига олган.
Элчи Розенблюм ўз нутқи давомида Ёмонжар каналининг қайта тикланиши ва сувнинг иқтисодиёт ўсишидаги ва минтақавий тинчликни сақлашдаги ўрни ҳақида сўз юритган.
«Сув бу – ҳаёт: у ҳар қандай иқтисодиётнинг ўсиши, минтақавий тинчлик ва барқарорлик ҳамда жамоавий фаровонлигимиз учун жуда муҳимдир. Қайта тикланган Ёмонжар канали сувни тежаш ва уни маҳаллий фермерларга суғориш учун тақдим этиш бўйича маҳаллий ҳамжамиятлар томонидан олиб борилаётган саъй-ҳаракатларни қўллаб-қувватлайди, бу ҳам ўз навбатида иқтисодий ривожланиш учун аҳамиятлидир. Ушбу канални қуриш ва тиклаш ишларини қўллаб-қувватлаганимиздан жуда мамнунмиз», – дейди АҚШнинг Ўзбекистондаги фавқулодда ва мухтор элчиси.
Қайта тикланган канал икки туман ўртасида сув истеъмолини ҳисобга олиш ва бу борадаги ҳисоботни такомиллаштиришга, сув ресурсларини бошқаришда шаффофликни таъминлашга ҳамда самарадорликни ошириш ва канал ўзанининг инфильтрациясини қисқартириш орқали сув йўқотишларини камайтиришга имкон беради, дейилади элчихона ахборотида.
«USAID томонидан молиялаштирилаётган «Сув, таълим ва ҳамкорлик» (Smart Waters) дастури Марказий Осиё мамлакатлари ва Афғонистонга сувни бошқариш бўйича техник кўникмаларни чуқурлаштиришга ёрдам беради ва трансчегаравий масалалар бўйича жамоалар ўртасида мулоқотни йўлга қўйишга ҳамда умумий сув ресурсларини бошқариш қобилиятига эга бўлган профессионал кадрларни ўқитишга ёрдам беради.
USAID Ўзбекистон ҳукумати билан мамлакат иқтисодиётини диверсификация қилиш ва минтақавий савдо ҳажмини ошириш, соғлиқ учун жиддий таҳдидларни, шу жумладан, COVID-19’ни бартараф этиш, шунингдек, ҳукуматнинг аҳоли эҳтиёжларини қондириш учун салоҳиятини ошириш бўйича иш олиб бормоқда», — дейилган хабарда.
Август ойида «Осиё инфратузилма инвестициялари банки иштирокида ‘Бухоро вилоятининг сув таъминоти ва канализация тизимларини ривожлантириш ва модернизация қилиш’ лойиҳасини амалга ошириш чора-тадбирлари тўғрисида»ги ҳукумат қарори қабул қилинган. Унга мувофиқ вилоятда сув таъминотини яхшилашга 2020—2023 йилларда жами 437,6 миллион доллар сарф қилиниши режалаштирилган.
Изоҳ (0)