АҚШ Халқаро тараққиёт агентлиги (USAID) раҳбари Саманта Пауэрнинг айтишича, Украина ҳукумати ҳарбий можаролар фонида ойига ўртача 5-6 миллиард доллар сарфламоқда. Пауэр хоним бундай харажатларни «ҳайратланарли» деб атади.
«Урушга бардош бериши керак бўлган ушбу ҳукуматнинг (Украина — тарҳ.) ўртача ойлик харажатлари, сўнгги ҳисоб-китобларга кўра, 5—6 миллиард доллар атрофида», — деди АҚШ вакили Жаҳон банки раҳбари билан суҳбат чоғида.
10 июнь куни АҚШнинг Украинадаги элчиси Бриджит Бринк АҚШдан Украинага 7,5 миллиард долларлик бюджет ёрдами ажратилишини эълон қилганди. Бироқ Пауэр хоним бу маблағ етарли эмас, деб ҳисобламоқда.
Май ойи охирида Украина Молия вазирлиги раҳбари Сергей Марченко мамлакат бюджетининг учдан икки қисми халқаро ёрдамга боғлиқ эканини айтган. Шу билан бирга, Украина бош вазири Денис Шмихал Украина бюджети тақчиллиги ойига 5 миллиард долларни ташкил қилганини таъкидлаган. Унинг сўзларига кўра, мамлакатдаги ҳарбий ҳаракатлар туфайли бутун иқтисодиётнинг қарийб 35 фоизи тўхтаб қолган.
Бирлашган Миллатлар Ташкилоти маълумотларига кўра, Россия босқини бошланган 24 февралдан 20 июнгача Украинада 4597 нафар тинч аҳоли, жумладан 313 нафари бола ҳалок бўлган. 5711 нафар тинч аҳоли жароҳатланган.
Донецк ва Луганск вилоятларининг Киев назорат қилаётган ҳудудларида 2508 киши ҳалок бўлган, 2430 киши яраланган. Вилоятларнинг Киев назорати остида бўлмаган ҳудудларида эса 184 киши ҳалок бўлган, 752 киши жароҳат олган, дея хабар беради БМТ. Украинанинг бошқа ҳудудларида 1905 киши уруш қурбони бўлган, 2529 киши яраланган.
Изоҳ (0)