АҚШ Халқаро тараққиёт агентлиги (USАID) Ўзбекистонда барқарор ва инклюзив иқтисодий ўсишни рағбатлантиришга қаратилган инновацион ташаббус, Бизнесни қўллаб-қувватлаш лойиҳаси бошланганини эълон қилди. Бу ҳақда Туризм қўмитаси хабар берди.
Қайд этилишича, Фарғона вилоятида бўлиб ўтган тақдимотда USАID тўртта асосий йўналиш: ахборот-коммуникация технологиялари, туризм, текстиль ва яшил иқтисодиётда кичик ва ўрта бизнесларнинг рақобатбардошлигини ошириш бўйича беш йиллик ташаббусни амалга оширишини эълон қилган. Лойиҳа иккита асосий мақсадга эришишга, хусусан, хусусий сектор ўсишида тўсиқларни бартараф этишга қаратилган.
“Бу ташаббус инклюзив ва барқарор келажак йўлидаги умумий интилишларимизнинг муҳим тамал тоши ҳисобланади. Ривожланиш йўлидаги муҳим тўсиқларни бартараф этиш ва хусусий сектор фаоллигини қўллаб-қувватлаш орқали биз бизнесда, айниқса, аёллар ва ёшлар бошчилигидаги корхоналар учун янги имкониятлар яратишни мақсад қилганмиз”, — дейди USАID’нинг Ўзбекистондаги миссияси директори Дэвид Хофман.
Март бошида USАID Ўзбекистон Энергетика вазирлиги ва энергетика сектори манфаатдор томонлари билан тоза энергия мақсадларини қўллаб-қувватлашга қаратилган янги ташаббус – Яшил водород хабини ишга тушириш устида ишлаётгани маълум бўлганди.
Изоҳ (0)