23 апрель куни АҚШ Халқаро тараққиёт агентлиги (USAID) Ўзбекистондаги ваколатхонаси директори Гари Роббинс Тошкент давлат аграр университети Андижон филиали ректори, доктор Абдуазиз Абдувосиқов билан USAIDнинг «Қишлоқ хўжалигида қиймат занжирини ривожлантириш» (АВC) лойиҳаси ёрдамида ташкил этилган интенсив боғ ва томчилатиб суғориш тизими ўрнатилган махсус кўргазма ер майдони очилиш маросимида иштирок этди. Бу ҳақда «Дарё»га АҚШнинг Ўзбекистондаги элчихонаси матбуот хизмати хабар берди.
Тадбир USAIDнинг АВC лойиҳаси фаолияти ва ТДАУнинг Андижон филиали о`ртасидаги икки йиллик ҳамкорлиги натижаси бўлиб, ҳамкорлик доирасида университет боғи учун 6,5 гектар, узумзор учун 1 гектар майдон ажратилган.
USAID тупроқ ва сув таҳлили, махсус участкалар учун энг яхши экинларни аниқлаш, боғни режалаштириш ва илғор томчилатиб суғориш тизимини ўрнатиш учун техник ёрдам кўрсатган.
Шунингдек, ҳамкорлик давомида USAID талабаларни олма, олхўри ва узум етиштиришнинг замонавий ишлаб чиқариш тартиб-тамойиллари, зараркунанда ва касалликлар назорати ҳамда томчилатиб суғориш тизимини бошқариш ва ишчи ҳолатда сақлаб туриш технологиялари билан таништирди.
«Унумдор тупроқ, мўътадил иқлим ва харидоргир мева, сабзавот ва ёнғоқлари билан Ўзбекистон юқори сифатли мева-сабзавот маҳсулотларини экспорт қилишда Марказий Осиёдаги етакчи мамлакат бўлишдай катта потенциалга эга», — деган жаноб Роббинс
Хабарда қайд этилишича, USAID’нинг АВC лойиҳаси Ўзбекистонда қишлоқ хўжалиги йўналишида иш ўринлари яратиш, мева-сабзавот маҳсулотлари сифати ва экспортини ошириш, таълим муассасалари ва хусусий сектор ўртасидаги муносабатларни мустаҳкамлаш йўлида фаолият олиб бораётган беш йиллик дастур ҳисобланади.
Изоҳ (0)