АҚШда ўқишни орзу қилаётган дунёнинг минглаб талабалари оммавий равишда ўз ижтимоий тармоқларини “тозаламоқда”. Машҳурлар ва сиёсатчиларга обунани бекор қилмоқда, сиёсий деб талқин қилиниши мумкин бўлган постлар ва ҳатто лайклар ҳам ўчирилмоқда. Бу ҳақда Washington Post (WP) газетаси хабар бермоқда.
Маълум қилинишича, бунга Дональд Трампнинг фармойиши билан виза текширувининг кучайтирилиши сабаб бўлган. АҚШ Давлат департаменти июнь ойида “кенгайтирилган скрининг” жорий этиб, ариза берувчилардан аккаунтларни очиқ қилишни ва виза офицерларига фотосуратлардан тортиб мемлар ва обуналаргача бўлган барча онлайн фаолиятни текширишга рухсат беришни талаб қилган.
Газета танишган Давлат департаментининг ички ҳужжатида айтилишича, офицерлар “Америка фуқаролари, маданияти, институтлари ва асосий тамойилларига душманлик” аломатларини аниқлашлари керак. Бундан ташқари, Исроилга қарши ҳар қандай танқид Америка манфаатларига зид деб қабул қилиниши мумкин.
Таъкидлашича, бундан талабалар ваҳимага тушган.
“Мен ҳамма нарсадан — Байден, Камала Харрис, Обама ва демократ конгрессменлардан обунани бекор қилдим”, дейди фамилиясини айтмасликни сўраган Мадлен.
Бошқалар Харрис постларидан лайкларни олиб ташлаган, Фаластин байроғи ёки тарвуз — Фаластинни қўллаб-қувватлаш рамзи бўлган фойдаланувчилардан обунани бекор қилишган.
Қайд этилишича, ҳатто нейтрал ҳаракатлар ҳам энди шубҳа остига олинмоқда. Бир талаба “деворга зарба бермоқчиман” мемини олиб ташлаган, чунки буни тажовузкорлик деб ҳисоблашларидан қўрққан. Бошқа бири Афғонистондаги хайрия ҳақидаги видеони кўришдан бош тортган — “лайк босган, кейин олиб ташлаган”.
Баъзилар пулли хизматларга мурожаат қилишмоқда. Пҳйлло ва Редаcт.дев каби стартаплар ижтимоий тармоқларда “хавфни сканерлаш” учун сунъий интеллект воситаларини реклама қилмоқда. Шиорлардан бири “Эски пост АҚШга бўлган режаларингни барбод қилишига йўл қўйма”.
Шу билан бирга, виса бериш юзасида рад этишлар сони ортиб бормоқда. Австриялик талабага ижтимоий тармоқлар йўқлиги сабабли виза бериш рад этилган. Чунки бу шубҳали деб топилган. Адвокатларнинг таъкидлашича, қарорлар тушунтирилмаяпти, апелляция бериш имкони йўқ. Виза берилмаган бўлса, бу қарорга эътироз билдиришнинг иложи йўқ. Шу билан бирга, виза бермаслик талабанинг бутун виза тарихига таъсир қилиши мумкин. Унга кейинги йил ҳам ҳужжатлар берилмаслиги эҳтимоли юқори.
Қоидаларнинг қаттиқлаштирилиши Трамп маъмуриятининг Фаластинга қарши чоралари, жумладан, норозилик намойишларида қатнашаётган хорижликларга босим ўтказиши билан боғлиқ. Янги кўрсатмалар фаолларнинг АҚШда фаолиятини давом эттириш-эттирмаслигини ва бу “академик мақсадлар”га мос келишини текширишни талаб қилади.
“Мен сиёсий нарсаларни умуман нашр этишни тўхтатдим. Энди менинг профилим шунчаки бўш шаблон”, дейди Мадлен.
Изоҳ (0)