Қозоғистон президенти Қосим-Жўмарт Тўқаев 30 июнь куни жамоат жойларида юзни таниб олишни қийинлаштирадиган кийимларни кийишни тақиқловчи қонунни имзолади.
Эндиликда қўшни республикада ниқоб кийиш ҳам тақиқланади. Қонун матнига кўра, хизмат вазифаларини бажариш, тиббий кўрсатмалар, ноқулай об-ҳаво шароитларидан ҳимояланиш, фуқаролик мудофааси мақсадлари, спорт ва маданий-оммавий тадбирларда иштирок этиш каби ҳолатларда одамларнинг юзини беркитишига рухсат берилади.
Юзни ёпиб турадиган кийим кийишни тақиқлаш июнь ойи бошида Сенат томонидан таклиф қилинган, 26 июнь куни Мажлис қонунга киритилган тузатишни маъқуллаб, имзолаш учун президентга юборган. Илгари президент Тўқаев юзни ёпиш ўрнига миллий ўзига хосликни таъкидлайдиган кийимлар кийишни таклиф қилганди.
Европа Иттифоқининг бир қатор мамлакатларида, жумладан, Франция, Дания, Нидерландияда, шунингдек, Шри Ланка каби бошқа давлатларда ҳам жамоат жойларида юзни беркитадиган диний либослар — ниқоб ва паранжи кийиш тақиқланган. Январь ойида Қирғизистонда ҳам ниқоб кийишни тақиқловчи қонун қабул қилинган.
Изоҳ (0)