Ўзбекистонга 2025 йилнинг январь апрель ойларида хориждан қиймати 213,7 млн долларга тенг бўлган 12 071 дона енгил автомобиль импорт қилинган. Бу ҳақда Миллий статистика қўмитаси хабар берди.
Тўрт ойда энг кўп енгил автомобиль импорт қилган давлатлар рейтингида Хитой пешқадам – 9 904 дона. Кейинги ўринда эса Жанубий Корея – 1 714 дона.
Шунингдек, Ҳиндистондан 168 дона, Япониядан 97 дона ҳамда АҚШдан 41 дона автомашина импорт қилинган.
Бундан ташқари, яна бошқа давлатлардан жами 147 дона автомашина олиб келинган.
2025 йилнинг январь февраль ойларида Ўзбекистонга хориждан 4,4 минг дона енгил автомобиль импорт қилингани ҳақида хабар берилганди.
Ўзбекистонда Вазирлар Маҳкамаси қарори билан 1 майдан электромобиллар учун 45 млн сўмдан 78 млн сўмгача утилизация йиғими ундирилиши кўзда тутилган. 2025 йил 1 майдан бошлаб:
- ишлаб чиқарилган муддатидан бошлаб 3 йилдан ортиқ бўлмаган электромобилларучун БҲМнинг 120 баравари (45 млн сўм);
- ишлаб чиқарилган муддатидан бошлаб 3 йилдан ортиқ бўлган электромобилларучун БҲМнинг 210 баравари (78 млн 750 минг сўм) этиб белгиланди.
Ўзбекистонда охирги пайтларда электромобиллар импорти кескин қисқармоқда. Масалан, 2025 йил январь—февраль ойларида мамлакатга электромобиллар импорти сезиларли камайди. Икки ой давомида жами 17 миллион 967 минг долларлик 1555 дона электромобиль олиб кирилган. 2024 йил январь—февраль ойларида эса 85 миллион 415 минг долларлик 3489 дона электромобиль импорт қилинганди.
Иқтисодчилар фикрича, импорт қисқаришига Тошкент вилояти Пискент туманидаги чет элдан келтирилган автомобиллар учун синов полигони ишга тушгани таъсир қилган бўлиши мумкин. Полигон қуввати Ўзбекистонга аввалгидек кўп автомобиль киритиш учун етарли эмас. Бу табиий равишда импорт жараёнини мураккаблаштиради, оқибатда автомобиллар нархи қимматлашади.
2024 йил 1 ноябрдан Ўзбекистонга импорт қилинадиган транспорт воситалари Пискент полигонида синовдан ўтказила бошланган. Бунга сабаб сифатида ҳаракат хавфсизлигини кучайтириш ва мамлакатга олиб кирилаётган транспорт воситалари сифатини яхшилаш мақсад қилингани билдирилган.
Март ойи якунида Техник жиҳатдан тартибга солиш агентлиги томонидан Хитойнинг Leapmotor C16 автомобилида “камчилик” аниқлангани маълум қилинди. Агентлик машиналарни сертификатлаш органларига огоҳлантириш хати юбориб, Leapmotor компаниясининг барча автомобиллари импортига тақиқ қўйилганини билдирди.
Аввалроқ BYD Uzbekistan Factory қўшма корхонаси ҳукуматдан электромобилларнинг тартибсиз импортини чеклашни сўраганди. Ўшанда жамоатчилик фаоллари импортни чеклаш рақобат йўқолишига олиб келишидан хавотир билдирган. Айрим иқтисодчилар фикрича, Ўзбекистонда янги автомобиль заводлари очилиши автомашиналар нархи пасайишига олиб келмайди.
Изоҳ (0)