Буюк Британияда TikTok ижтимоий тармоғига қарам бўлиб қолган аёл иш жойидан 500 минг доллар ўғирлаб, блогерларга совғалар сотиб олишга сарфлади. Бу ҳақда Daily Mail хабар беради.
Кетрин Гринолл ушбу пулларни New Reg Ltd автомобиль компаниясида ҳисобчи бўлиб ишлаган пайтида ўғирлашга муваффақ бўлган. Молиявий тизимларга кириш имконияти туфайли у 121 та ноқонуний транзакцияларни амалга оширган. Умуман олганда, аёл ўзининг шахсий ҳисоб рақамларига тахминан 500 минг доллар ўтказган.
Гринолл пул ўғирлашда қўлга тушмасликка муваффақ бўлгач, у ноқонуний йўл билан топилган пулларни уй харид қилиш учун сарфлай бошлади. Тез орада аёл меҳмонхоналар, саёҳатлар ва Амазонъдаги харидлар учун пул тўлай бошлади.
Унинг эътироф этишича, бу пулларнинг тахминан 400 минг доллари севимли тиктокерларга совғалар учун сарфланган. Британиялик аёлнинг адвокати унинг хатти-ҳаракатлари расман тасдиқлаш қийин бўлса-да “TikTok’га қарамлик” сабаб бўлганини айтмоқда.
Компания раҳбарияти Гриноллнинг биринчи ноқонуний транзакциясидан бир неча йил ўтгачгина даромад пасайганини аниқлади. Раҳбарлар ундан изоҳ сўрашди ва у текширув ўтказишга ваъда берди. Бироқ бунинг ўрнига аёл 27 минг долларлик сўнгги пул ўтказмасини амалга оширди ҳамда қариндошининг касаллигини баҳона қилиб, офисни тарк этди. Бир ҳафта ўтгач, у полицияга ўзини тутиб бериб, фирибгарлик қилганини тан олди.
Суднинг таъкидлашича, Гриноллнинг ҳаракатлари 1995 йилдан бери мавжуд бўлган компанияни тўлиқ банкротликка олиб келиши мумкин эди, бу эса 30 дан ортиқ ходимни ишсиз қолдирган бўларди. Ҳозирда суд жараёни давом этмоқда. Қизнинг муқаддам судланмагани ва икки нафар вояга етмаган фарзанди олдида мажбуриятлари борлигига қарамай, британиялик аёлга барибир қамоқ жазоси таҳдид солмоқда, чунки судьянинг сўзларига кўра, компанияга “жуда катта зарар етказилган”.
Изоҳ (0)