Эронда Исроил разведкаси “Моссад” фойдасига жосусликда айбланган шахс қатл этилди. Бу ҳақда Mizan агентлиги хабар бермоқда.
Гап 2024 йил декабрь ойида ҳибсга олинган Исмоил Фекри ҳақида бормоқда. Агентлик маълумотларига кўра, у мукофот эвазига Эрон ҳақидаги махфий маълумотларни етказган, шунингдек, Исроил разведкасининг икки зобити билан алоқада бўлган.
“Сионистик режим фойдасига жосуслик қилгани учун қамоққа олинган ва ҳукм қилинган шахс бугун эрталаб тўлиқ жиноий суд жараёнидан ўтгач ва ҳукм Олий судда тасдиқлангач, қатл этилди”, дейилади хабарда.
Таъкидланишича, Фекри “Моссад” офицерларидан бирига махфий алоқа орқали махфий маълумотларни, жумладан, махфий объектларнинг жойлашуви, бош қароргоҳлар, муайян шахслар ва бошқалар ҳақидаги маълумотларни етказишга уринган.
Ҳимоячилар Фекрининг ҳукми устидан шикоят қилишга уринишган, бироқ апелляция инстанцияси — Эрон Олий суди уни ўз кучида қолдирган.
Anadolu агентлиги хабар қилишича, Исмоил Фекри миллати жиҳатидан эронлик бўлган. Сўнгги ҳафталарда Эронда Исроил фойдасига жосусликда айбланган яна икки киши қатл этилгани таъкидланмоқда.
Исроилнинг хориждаги операцияларида “Моссад” фаол иштирок этмоқда. Мамлакат махсус хизматларининг номи ошкор этилмаган вакили Исроил разведкаси зарба беришдан олдин Эрон ҳарбий-ҳаво кучлари қўмондонларини алдов йўли билан йиғинга чақиришга эришганини айтган.
Бундан аввал Эронда “Моссад”нинг икки агенти қўлга олинган. Улардан 23 та дрон учун ускуналар, ишга тушириш мосламалари, бошқарув қурилмалари ва Ниссан юк машинаси, шунингдек, 200 килограммдан ортиқ портловчи моддалар топилган.
Изоҳ (0)