Eronda Isroil razvedkasi “Mossad” foydasiga josuslikda ayblangan shaxs qatl etildi. Bu haqda Mizan agentligi xabar bermoqda.
Gap 2024-yil dekabr oyida hibsga olingan Ismoil Fekri haqida bormoqda. Agentlik ma’lumotlariga ko‘ra, u mukofot evaziga Eron haqidagi maxfiy ma’lumotlarni yetkazgan, shuningdek, Isroil razvedkasining ikki zobiti bilan aloqada bo‘lgan.
“Sionistik rejim foydasiga josuslik qilgani uchun qamoqqa olingan va hukm qilingan shaxs bugun ertalab to‘liq jinoiy sud jarayonidan o‘tgach va hukm Oliy sudda tasdiqlangach, qatl etildi”, deyiladi xabarda.
Ta’kidlanishicha, Fekri “Mossad” ofitserlaridan biriga maxfiy aloqa orqali maxfiy ma’lumotlarni, jumladan, maxfiy obyektlarning joylashuvi, bosh qarorgohlar, muayyan shaxslar va boshqalar haqidagi ma’lumotlarni yetkazishga uringan.
Himoyachilar Fekrining hukmi ustidan shikoyat qilishga urinishgan, biroq apellyatsiya instansiyasi — Eron Oliy sudi uni o‘z kuchida qoldirgan.
Anadolu agentligi xabar qilishicha, Ismoil Fekri millati jihatidan eronlik bo‘lgan. So‘nggi haftalarda Eronda Isroil foydasiga josuslikda ayblangan yana ikki kishi qatl etilgani ta’kidlanmoqda.
Isroilning xorijdagi operatsiyalarida “Mossad” faol ishtirok etmoqda. Mamlakat maxsus xizmatlarining nomi oshkor etilmagan vakili Isroil razvedkasi zarba berishdan oldin Eron harbiy-havo kuchlari qo‘mondonlarini aldov yo‘li bilan yig‘inга chaqirishga erishganini aytgan.
Bundan avval Eronda “Mossad”ning ikki agenti qo‘lga olingan. Ulardan 23 ta dron uchun uskunalar, ishga tushirish moslamalari, boshqaruv qurilmalari va Nissan yuk mashinasi, shuningdek, 200 kilogrammdan ortiq portlovchi moddalar topilgan.
Izoh (0)