Қозоғистоннинг Туркистон вилоятида вертолётлар ва учувчисиз учиш аппаратлари, шу жумладан одамлар ва юкларни ташиш учун мўлжалланган дронлар ишлаб чиқарадиган янги завод барпо этилиши кутилмоқда. Бу ҳақда Туркистон вилояти ҳокимлиги ахборот хизмати хабар бермоқда.
Маълум қилинишича, Туркистон вилояти ҳокими Нуралхон Кушеров инвестор вакили билан учрашувда лойиҳани амалга ошириш шартларини муҳокама қилган. Хорижий компания Туркистон вилоятига тахминан 290 миллион доллар миқдорида сармоя киритишни режалаштирмоқда. Завод 150 тагача янги иш ўрни яратиши ва минтақа саноатида янги йўналишларни ривожлантиришга туртки бўлиши кутиляпти.
Корхона ҳам фуқаролик, ҳам эҳтимолий махсус вертолёт ва дрон моделларини ишлаб чиқаради. Улар логистика, қишлоқ хўжалиги, туризм, инфратузилмани назорат қилиш ва бошқа соҳаларда қўлланилади.
Лойиҳа иқтисодиётнинг тез ривожланаётган сектори — қуйи авиацияга, яъни 3000 метргача баландликда учувчи аппаратларга қаратилган. Бу шаҳар ҳаво транспорти, товарларни етказиб бериш ва дронлар ёрдамида фавқулодда ёрдам кўрсатиш, шунингдек, улардан қишлоқ хўжалиги ҳамда саноат тармоқларида фойдаланишни ўз ичига олади.
Изоҳ (0)