Шри-Ланкада автобус жарликка қулаши оқибатида камида 21 киши ҳалок бўлди, 35 киши жароҳатланди. Бу ҳақда маҳаллий полицияга таяниб, Al Jazeera хабар берди.
Ҳодиса 11 май куни мамлакатнинг марказий қисмида, Нувара Элия ва Гампола ўртасидаги автомобиль йўлида содир бўлган. Автобус Катарагамадаги зиёратгоҳдан 75 нафар йўловчини олиб қайтаётган эди. Йўловчилар Курунегала шаҳрига олиб кетилаётган бўлган.
Автобус бурилишдан ўтаётганда тахминан 100 метр баландликдаги қоядан қулаб тушган. Ҳодиса оқибатида 21 киши ҳалок бўлган, 30 дан ортиқ киши турли даражадаги тан жароҳатлари олган. Полиция ҳодиса тафсилотларини текширмоқда, қурбонларнинг шахси аниқланмоқда. Тирик қолганлардан бири маҳаллий журналистга автобуснинг олд қисмида бўлганини ва фақат енгил жароҳатлар олганини айтган.
9 май куни Шри Ланкада ҳарбий вертолёт ҳалокатга учраши оқибатида олти нафар ҳарбий ҳалок бўлганди. Белл 212 русумли вертолёт оролнинг марказий қисмида жойлашган Мадуру Оя сув омборига қулаб тушган. Вертолёт бортида ўнга яқин ҳарбий хизматчи бўлган. Вертолётга жанговар ҳаракатлар тугагани муносабати билан ўтказиладиган парадга тайёргарлик доирасида машғулот бажариш топширилганди.
Изоҳ (0)