Самарқандда яна бир келин эри томонидан бўғиб ўлдирилди

Самарқанд вилояти Оқдарё туманидаги хонадонлардан бирида келин ўз турмуш ўртоғи томонидан бўғиб ўлдирилди. Бу ҳақда “Миллар” дастурида хабар берилди. 

Маълум қилинишича, турмуш қурганига 7 йил бўлган эр-хотин ўртасида доимий жанжаллар бўлиб турган. Улар маҳаллада низоли оилалар рўйхатига киритилган. Эркак бундан аввал маъмурий жавобгарликка тортилган ва 15 сутка қамоқда бўлган. Вақт ўтиб, улар муаммоли оилалар рўйхатидан чиқарилган.

Марҳуманинг онаси қизи доимий равишда жанжаллар орасида яшаганини, жанжалга қайнонаси, қайнсингиллари аралашганини, улар қизини калтаклаганини таъкидлаган. Аёл бир неча бор қизига яшамасликни айтган, бироқ марҳума эри яхши эканини айтиб яшашда давом этган. 

Ҳодиса содир бўлган куни марҳуманинг яқинлари воқеа жойига етиб борганида, ҳудуд ҳуқуқ-тартибот идоралари ходимлари томонидан ўраб олинган бўлган. Қизларини кўриш имкони бўлмаган. Уларга қизларини куёви бўғиб ўлдиргани ҳақида хабар берилган.

Вилоят прокуратурасининг хабарига кўра, ҳозирда ҳолат юзасидан Жиноят кодексининг 97-моддаси 1-қисми (қасддан одам ўлдириш) билан жиноят иши қўзғатилган. Гумонланувчи ҳибсга олинган, ҳолат юзасидан тергов олиб борилмоқда.

Шу куни Самарқанд вилояти Тойлоқ туманида 26 июль куни Зебойи Жаҳон тахаллуси билан танилган хонанда Зебинисо Носирова ўлдириб кетилгани ҳақида хабар берилди. Қотилликда унинг турмуш ўртоғи гумон қилинмоқда. Хабарда айтилишича, эр болаларини кўриш учун хонанданинг уйига келган. Суҳбат давомида эр-хотин ўртасида жанжал келиб чиққан. Жанжал пайтида эркак уни қўллари билан бўғган, оқибатда аёл воқеа жойида вафот этган.

Тошкент вилоятида эр аёлини ўлгунича калтаклаб, вафотига сабабчи бўлгани ҳақида хабар берилган. Андижонда эса эркак жанжал сабаб хотинини ўлдирди. 

Сурхондарё вилоятида эркак қайнукаси томонидан, Самарқандда 70 ёшли эркак 60 ёшли қайнукаси томонидан пичоқланганди. Бухорода эр жанжал сабаб хотинини пичоқлагани, Жиззахда эр рашк сабаб аввал хотинини, кейин эса ўзини пичоқлаб ўлдиргани, Вобкент туманида маст фуқаро қайнукасини пичоқлагани тўғрисида хабар берилганди.

• Чинозда 25 ёшли эркак хотини ва қайнанасини қасддан ўлдирди.
• Фарғонада эркак бир гуруҳ дўстлари билан собиқ куёвини дўппослади.
• Чинозда ука ўз опасини ўлдириб, 7 кун уйда сақлади.
• Самарқандда қайнона келинини қувватлагич сими билан бўғиб ўлдирди.
• Андижонлик ўқитувчи аёл пичоқлаб ўлдирилди. Гумонланувчи эр қўлга олинди.
• Наманганда эркак дўконда хотинини пичоқлаб ўлдирди.
• Сурхондарёда аёлига тазйиқ ўтказган эркак қамалди.
• Сурхондарёда 71 ёшли аёл ўз уйида ўлдириб кетилди.
• Бухоролик эркак хотини билан ажрашишни талаб қилган аёлни ёстиқ билан ўлдирди.