Сериаллар орқали миллионлаб томошабинлар қалбидан жой олган актёрлар доим ҳам экрандаги ролларидан мамнун бўлавермайди. Айрим образлар карьера тарихидаги энг муваффақиятли деб ҳисобланса ҳам, бунинг ортида оғриқли тажрибалар, саломатлик билан боғлиқ муаммолар ва руҳий босимлар яширинган бўлади. Қуйида дунёга машҳур ролларини миннатдорчилик билан эмас, балки афсус билан эслайдиган турк кино юлдузлари ҳақида сўз боради.
Марям Узерли — Хуррам (“Муҳташам юз йил”)
Узерлининг бу роли турк сериаллар тарихида энг машҳурларидан бирига айланди. Бироқ бу муваффақиятнинг нархи актрисага қимматга тушди. Марям узоқ давом этган суратга олиш ишлари, ролдан чиқа олмаслик, тўсатдан ҳомиладорлик ортидан келган стресс, фарзанд отасининг хиёнати ва турли босимлар туфайли Германияга қайтиб, руҳий саломатлигини тиклашга мажбур бўлди.
Буче Бусе Каҳраман — Пелин (“Қўрғон сирлари”)
“Қўрғон сирлари” сериалидаги Пелин роли Бучега кутилмаган машҳурлик олиб келди, аммо жанжалкаш ва зиддиятли характерга эга Пелин образи туфайли актриса кўплаб танқид ва ҳақоратларга учради. Уни ижтимоий тармоқларда лаънатлай бошлашди, ҳатто ўлимини тилаганлар ҳам бўлди. Бунга чидай олмаган актрисанинг менежери судга мурожаат қилди. Ҳатто Бученинг оиласи ҳам бу ҳолатдан азият чекди.
Муже Узман — Алев (“Қизил шарбат”)
Иккинчи мавсум охирида Муженинг сериални тарк этиши мухлисларни қаттиқ хафа қилди, чунки унинг қаҳрамони Алев кўпчиликка ёқиб тушган эди. Аммо актрисанинг соғлиги бунга дош беролмади. Визајист билан бўлган можаролардан сўнг астма хуружи, касалхонага тушиш ва касалликларнинг кучайиши уни ролидан воз кечишга мажбур қилди. Шу сабабли продюсер Алевга фожиали якун топадиган сценарий берди.
Керем Бурсин — Серкан Болат (“Қалбим эшигини қоқ”)
Турк романтик комедиясининг асосий қаҳрамони Серкан Болат совуққон, ҳис-туйғуларини кўрсатмайдиган, қатъиятли ва эҳтиёткор инсон сифатида тасвирланади. Ҳаттоки сериал қаҳрамони Эда уни “робот” деб атайди.
Аммо Серкан ролини ижро этган Керем Бурсин ҳаётда образига умуман ўхшамайди. Ҳамкасбларининг айтишича, у жуда ҳаракатчан, ҳазилкаш ва жамоада яхши кайфият яратишга ҳаракат қиладиган инсон. Масалан, Ҳанде Эрчел бир неча бор актёрнинг ҳазилларининг ҳаддан ташқари кўплигидан норози бўлган. Керем билан Серканни боғлайдиган ягона ўхшашлик бу иккисининг меҳнатсеварлигидир.
Сериал тугагач ҳам Керемни ҳар доим Серкан билан солиштирилиши, “битта ролга боғланиб қолган актёр” сифатида эсда қолиши эса актёрга умуман ёқмаган ва шу сабабли ушбу сериалидаги ижросидан кўнгли тўлмаган.
Алперен Дуймаз — Эрхан (“Эго: Эркакларга ишониб бўлмайди”)
Бу лойиҳада Алпререн Дуймаз “Тўқнашув”даги жуфтлиги Мелиса Асли Памук билан яна бирга ишлаган. Аммо улар суратга тушиш вақтида доим тортишиб юришган. Актёр Эрхан характерининг бетайинлиги ёқтирмаган. У очиқчасига бу сериалдан эртароқ чиқишни исташини айтган, натижада лойиҳа 13-қисмда тугатилган. Эндиликда Дуймаз бу ролни эслашни ҳам истамайди.
Ҳалит Эргенч — Султон Сулаймон (“Муҳташам юз йил”)
Ҳалит Эргенч ушбу сериалнинг охиригача қолганига қарамай, у ҳам ўз ролини осонлик билан ижро эта олмади. Сериал тугагач, актёр психотерапевтга мурожаат қилди. Интервьюларда у Сулаймоннинг баъзи ҳаракатларини тушунмаслигини ва у каби одам бўлишни истамаслигини таъкидлаган.
Сила Туркўғлу — Доа (“Қизил шарбат”)
Учинчи мавсумда Сила қаҳрамонининг тақдири яна ўтмишдаги хатоларга тўла эканлиги актрисага ёқмади. Айниқса, Доанинг яна Фатиҳ билан бирга бўлиши, яъни носоғлом муносабатларга қайтиши актрисанинг норозилигига сабаб бўлди. Сила бундай алоқаларни кескин танқид қилар эди. Шу туфайли кўплаб мухлислар унинг сериалдан кетиб қолишидан хавотирлана бошлади. Аммо шунга қарамай Туркўғлу тўртинчи мавсумда ҳам иштирок этди.
Мерт Рамазон Демир — Ферит (“Қўрғон сирлари”)
Сериалдаги Ферит аёлларни осонлик билан ўзига ром қиладиган, кечаларини зиёфатларда ўтказадиган, бир оз енгил табиат, масъулиятсиз ва ҳавойи образ сифатида гавдаланган. Кўплар уни “ёмон йигит” деб атаган.
Аммо актёр Мерт Рамазон Демир ҳаётда бу образдан кескин фарқ қилади. У сокин, камтар, камгап ва атрофидагиларга нисбатан меҳрибон инсон. Шу сабабли актёр бошқа бу каби ролларга қайтишни истамаслигини тан олган.
Неслиҳан Атагул — Наре (“Элчининг қизи”)
Сериалдаги ушбу образ туфайли актрисанинг соғлиғи ёмонлашиб, унинг вазни 45 кг гача тушиб кетган. Сўнг Атагул шифохонага ётқизилган, лекин мухлислар уни пул ёки шартнома учун лойиҳани тарк этди, деб ўйлашган. Аслида актриса сўнгги дақиқаларгача сериалда қолишга ҳаракат қолган, аммо жисмонан ва руҳий жиҳатдан чарчагач, сериални тарк этишга мажбур бўлган.
Изоҳ (0)