Seriallar orqali millionlab tomoshabinlar qalbidan joy olgan aktyorlar doim ham ekrandagi rollaridan mamnun bo‘lavermaydi. Ayrim obrazlar karyera tarixidagi eng muvaffaqiyatli deb hisoblansa ham, buning ortida og‘riqli tajribalar, salomatlik bilan bog‘liq muammolar va ruhiy bosimlar yashiringan bo‘ladi. Quyida dunyoga mashhur rollarini minnatdorchilik bilan emas, balki afsus bilan eslaydigan turk kino yulduzlari haqida so‘z boradi.
Maryam Uzerli — Xurram (“Muhtasham yuz yil”)
Uzerlining bu roli turk seriallar tarixida eng mashhurlaridan biriga aylandi. Biroq bu muvaffaqiyatning narxi aktrisaga qimmatga tushdi. Maryam uzoq davom etgan suratga olish ishlari, roldan chiqa olmaslik, to‘satdan homiladorlik ortidan kelgan stress, farzand otasining xiyonati va turli bosimlar tufayli Germaniyaga qaytib, ruhiy salomatligini tiklashga majbur bo‘ldi.
Buche Buse Kahraman — Pelin (“Qo‘rg‘on sirlari”)
“Qo‘rg‘on sirlari” serialidagi Pelin roli Buchega kutilmagan mashhurlik olib keldi, ammo janjalkash va ziddiyatli xarakterga ega Pelin obrazi tufayli aktrisa ko‘plab tanqid va haqoratlarga uchradi. Uni ijtimoiy tarmoqlarda la’natlay boshlashdi, hatto o‘limini tilaganlar ham bo‘ldi. Bunga chiday olmagan aktrisaning menejeri sudga murojaat qildi. Hatto Buchening oilasi ham bu holatdan aziyat chekdi.
Muje Uzman — Alev (“Qizil sharbat”)
Ikkinchi mavsum oxirida Mujening serialni tark etishi muxlislarni qattiq xafa qildi, chunki uning qahramoni Alev ko‘pchilikka yoqib tushgan edi. Ammo aktrisaning sog‘ligi bunga dosh berolmadi. Vizaјist bilan bo‘lgan mojarolardan so‘ng astma xuruji, kasalxonaga tushish va kasalliklarning kuchayishi uni rolidan voz kechishga majbur qildi. Shu sababli prodyuser Alevga fojiali yakun topadigan ssenariy berdi.
Kerem Bursin — Serkan Bolat (“Qalbim eshigini qoq”)
Turk romantik komediyasining asosiy qahramoni Serkan Bolat sovuqqon, his-tuyg‘ularini ko‘rsatmaydigan, qat’iyatli va ehtiyotkor inson sifatida tasvirlanadi. Hattoki serial qahramoni Eda uni “robot” deb ataydi.
Ammo Serkan rolini ijro etgan Kerem Bursin hayotda obraziga umuman o‘xshamaydi. Hamkasblarining aytishicha, u juda harakatchan, hazilkash va jamoada yaxshi kayfiyat yaratishga harakat qiladigan inson. Masalan, Hande Erchel bir necha bor aktyorning hazillarining haddan tashqari ko‘pligidan norozi bo‘lgan. Kerem bilan Serkanni bog‘laydigan yagona o‘xshashlik bu ikkisining mehnatsevarligidir.
Serial tugagach ham Keremni har doim Serkan bilan solishtirilishi, “bitta rolga bog‘lanib qolgan aktyor” sifatida esda qolishi esa aktyorga umuman yoqmagan va shu sababli ushbu serialidagi ijrosidan ko‘ngli to‘lmagan.
Alperen Duymaz — Erxan (“Ego: Erkaklarga ishonib bo‘lmaydi”)
Bu loyihada Alpreren Duymaz “To‘qnashuv”dagi juftligi Melisa Asli Pamuk bilan yana birga ishlagan. Ammo ular suratga tushish vaqtida doim tortishib yurishgan. Aktyor Erxan xarakterining betayinligi yoqtirmagan. U ochiqchasiga bu serialdan ertaroq chiqishni istashini aytgan, natijada loyiha 13-qismda tugatilgan. Endilikda Duymaz bu rolni eslashni ham istamaydi.
Halit Ergench — Sulton Sulaymon (“Muhtasham yuz yil”)
Halit Ergench ushbu serialning oxirigacha qolganiga qaramay, u ham o‘z rolini osonlik bilan ijro eta olmadi. Serial tugagach, aktyor psixoterapevtga murojaat qildi. Intervyularda u Sulaymonning ba’zi harakatlarini tushunmasligini va u kabi odam bo‘lishni istamasligini ta’kidlagan.
Sila Turko‘g‘lu — Doa (“Qizil sharbat”)
Uchinchi mavsumda Sila qahramonining taqdiri yana o‘tmishdagi xatolarga to‘la ekanligi aktrisaga yoqmadi. Ayniqsa, Doaning yana Fatih bilan birga bo‘lishi, ya’ni nosog‘lom munosabatlarga qaytishi aktrisaning noroziligiga sabab bo‘ldi. Sila bunday aloqalarni keskin tanqid qilar edi. Shu tufayli ko‘plab muxlislar uning serialdan ketib qolishidan xavotirlana boshladi. Ammo shunga qaramay Turko‘g‘lu to‘rtinchi mavsumda ham ishtirok etdi.
Mert Ramazon Demir — Ferit (“Qo‘rg‘on sirlari”)
Serialdagi Ferit ayollarni osonlik bilan o‘ziga rom qiladigan, kechalarini ziyofatlarda o‘tkazadigan, biroz yengil tabiat, mas’uliyatsiz va havoyi obraz sifatida gavdalangan. Ko‘plar uni “yomon yigit” deb atagan.
Ammo aktyor Mert Ramazon Demir hayotda bu obrazdan keskin farq qiladi. U sokin, kamtar, kamgap va atrofidagilarga nisbatan mehribon inson. Shu sababli aktyor boshqa bu kabi rollarga qaytishni istamasligini tan olgan.
Neslihan Atagul — Nare (“Elchining qizi”)
Serialdagi ushbu obraz tufayli aktrisaning sog‘lig‘i yomonlashib, uning vazni 45 kg gacha tushib ketgan. So‘ng Atagul shifoxonaga yotqizilgan, lekin muxlislar uni pul yoki shartnoma uchun loyihani tark etdi, deb o‘ylashgan. Aslida aktrisa so‘nggi daqiqalargacha serialda qolishga harakat qolgan, ammo jismonan va ruhiy jihatdan charchagach, serialni tark etishga majbur bo‘lgan.
Izoh (0)