Туркияда миллиардер Илон Маскнинг хAI компанияси томонидан ишлаб чиқилган Грок сунъий интеллектли чат-ботига кириш блокланди. Бу ҳақда Reuters хабар берди.
Туркия расмийларининг билдиришича, Грок турк тилида берилган айрим саволларга жавобан президент Ражаб Тоййиб Эрдўғон, замонавий Туркия асосчиси Мустафа Камол Отатурк ва диний қадриятларни ҳақорат қилувчи контент тақдим этган. Шу сабабли Анқара бош прокуратураси ҳодиса юзасидан расмий текширув бошланганини маълум қилди.
Бу Туркияда сунъий интеллект платформасига нисбатан қўлланган биринчи расмий блоклаш чораси ҳисобланди. Мавжуд қонунчиликка кўра, Туркия президентини ҳақорат қилиш жиноят ҳисобланади. Бунинг учун тўрт йилгача озодликдан маҳрум қилиш жазоси белгиланган. Шу асосда Туркия Ахборот ва коммуникация технологиялари бошқармаси суд қарорига таяниб, Грокъни блоклаш тўғрисида қарор чиқарган.
Х (собиқ Twitter) платформаси ҳам, Илон Маскнинг ўзи ҳам бу ҳолат юзасидан ҳозирча изоҳ бермаган. Сунъий интеллектга эга чат-ботлар сиёсий тарафкашлик, нафрат тили ва фактик хатолар юзасидан танқид остида қолмоқда.
Бундай хавотирлар OpenAI компанияси 2022 йилда ChatGPT’ни ишга туширганидан буён мавжуд. Айнан ўшанда Грок Адолф Гитлерни мақтов билан тилга олган контент эълон қилгани учун танқидга учраганди.
Изоҳ (0)