АҚШ президенти Дональд Трамп Қўшма Штатларнинг Африкадаги мавқейини мустаҳкамлаш мақсадида бир қатор Африка раҳбарларига “жуда катта тижорат имкониятлари”ни таклиф этишни режалаштирмоқда. Бу ҳақда Semafor портали хабар берди.
“Трамп келаси ҳафта Африканинг бешта раҳбарини қабул қилиб, Оқ уй қитъада ‘жуда катта тижорат имкониятлари’ деб атаган масалани муҳокама қилади”, дея таъкидланди нашр хабарида.
Портал маълумотларига кўра, Трамп АҚШнинг Африкадаги манфаатларини кучайтириш ваъдасини бериб, асосий эътиборни қитъадаги муҳим фойдали қазилма конларини назорат қилишга қаратмоқчи.
Таъкидланишича, кўплаб Африка давлатлари таяниб келган АҚШ ёрдамининг кескин қисқариши уларнинг Вашингтон билан дипломатик муносабатларининг ёмонлашувига олиб келди. Шу билан бирга, Хитой ва Россия минтақадаги ўз таъсирини кучайтирди.
АҚШ президенти Дональд Трамп Оқ уйга қайтганидан сўнг илк бор 9-11 июль кунлари Вашингтонда Африка давлатлари раҳбарлари билан саммит ўтказади.
Маълумотларга кўра, Америка пойтахтига Габон, Гвинея-Бисау, Либерия, Мавритания ва Сенегал раҳбарлари ташриф буюради. Вашингтон саммитда Ғарбий Африка давлатлари билан фойдали қазилмалар соҳасидаги ҳамкорлик, шунингдек, минтақавий хавфсизлик масалаларини муҳокама қилишни мўлжалламоқда.
“Бундан ташқари, кузда янада кенг кўламли АҚШ—Африка саммитини ўтказиш режалаштирилган”, дея хабар бермоқда Semafor. У сентябрь ойида Нью Йоркда бўлиб ўтиши кутилмоқда.
Маълумот ўрнида, АҚШ раҳбари Яқин Шарққа расмий ташрифи давомида Қатар билан 1,2 триллион долларлик иқтисодий битим имзолади, Саудия Арабистони эса АҚШга 600 миллиард доллар сармоя киритиш мажбуриятини олди.
Изоҳ (0)