Россия Одессага 19 та ракета учирди. ЮНЕСКО маданий ёдгорлиги ҳисобланган Преображенский собори вайрон қилинди (видео, фото)

Россия қўшинлари 23 июлга ўтар кечаси Одессага ракета ҳужуми уюштирди. Шаҳардаги энг йирик ва ЮНЕСКО маданий ёдгорлиги ҳисобланган Преображенский кафедрал собори вайрон бўлди. Бу ҳақда Meduza хабар берди.

Украина Қуролли кучларига кўра, ҳужум пайтида қарши томон беш турдаги 19 та ракетани қўллаган:

• аннексия қилинган Қримдаги “Бастион” қирғоқ ракета тизимидан бешта қанотли Оникс учирилган;
• Қора денгиздан Ту-22МЗ самолётларидан учта Кҳ-22 қанотли ракеталар ишга туширилган;
• тўртта “Калибр” денгиздан учириладиган қанотли ракеталар учирилган;
• Қримдан бешта “Искандер-К” қанотли ракеталари ва иккита “Искандер-М” баллистик ракеталари учирилган. 

Украина ҳаво ҳужумидан мудофаа кучлари тўққизта ракетани йўқ қилишга муваффақ бўлган: тўртта “Калибр” ва бешта “Искандер-К”.

Россиянинг Одессага берган авиазарбалар оқибатида порт инфратузилмаси вайрон бўлган, камида олтита турар-жой биноси, жумладан, кўп қаватли уйлар, шунингдек, ўнлаб автомобиллар зарар кўрган.

Одесса вилояти ҳарбий маъмурияти раҳбари Юрий Крук Одессага тунги ҳужумни Россиянинг тарихий шаҳар марказига уруш бошланганидан бери берган энг йирик зарбаси деб атади.

Шунингдек, Преображенский собори билан бир қаторда йигирмадан ортиқ меъморий ёдгорлик ҳам зарар кўрган. 

“Дастлабки маълумотларга кўра, Одессада бир кечада россияликлар томонидан 25 та меъморий ёдгорлик зарар кўрди”, — дейилади хабарда.

Улар орасида ХIX-ХХ асрлардаги бинолар:

• Чижевича уйи
• Папудова уйи
• Заблудовский уйи
• Гагарин уйи
• Януш уйи
• Жданова уйи
• Рассел дел Турко уйи
• Масса уйи
• Манук Бей саройи
• Ковалевский уйи
• Порро уйи
• Машевский уйи ва бошқалар.

Шунингдек, турар-жой бинолари вайрон бўлган, бир киши ҳалок бўлган, 22 киши эса жароҳат олган.

“Тинч шаҳарларга, турар-жой биноларига, соборга қарши ракеталар. Рус ёвузлигини оқлаб бўлмайди. Ҳар доимгидек, бу ёвузлик ютқазади. Албатта, Одесса учун рус террорчиларидан ўч олинади. Улар бу қасосни ҳис қилади.

Ушбу охирги терактдан жабр кўрганларнинг барчасига ёрдам кўрсатилмоқда. Мен одамларга ёрдам бераётган ҳар бир кишига миннатдорлик билдираман. Биз буни енгиб ўтамиз. Биз тинчликни тиклаймиз. Вунинг учун биз рус ёвузлигини енгишимиз керак”, — дея Зеленский Одессага ҳужумга муносабат билдирди.