Россия кучлари 30 апрель куни Украина жанубидаги Одесса порт шаҳрига баллистик ракеталар билан ҳужум қилиши оқибатида 3 нафар тинч аҳоли вакиллари ҳалок бўлган. Бу ҳақда Тhе Kyiv Independent нашри хабар берди.
Талафотлар ҳақида дастлаб Одесса губернатори Олеҳ Кипер хабар берган. Уч киши ҳалок бўлгани, шунингдек, яна 3 фуқаро жароҳатлангани айтилган.
Расмийлар қурбонларнинг шахси ҳақида ҳеч қандай маълумот бермаган. Жароҳатланганларга тиббий ёрдам кўрсатилаётгани айтилган.
Украина ҳарбий ҳаво кучлари 30 апрелга ўтар кечаси Одессада ҳаво ҳужуми бўлиши тўғрисида бир қатор огоҳлантиришлар эълон қилган. Аҳолидан хавфсизлик чоралари кўриш сўралган.
29 апрель куни ҳам Россия ракеталари Одессага ҳужум қилиши оқибатида беш нафар фуқаро ҳалок бўлгани хабар қилинган эди. Шунингдек, ҳужумда камида 30 киши жароҳатлангани эълон қилинган.
Россия 2024 йилнинг баҳорида Украинанинг турар жой ва фуқаролик инфратузилмасига қарши ҳужумларни кучайтиргани хабар қилинган эди. Ҳужумлар асосан мамлакат жануби ва жануби-шарқий минтақаларига қаратилган.
Украина ҳарбий ҳаво кучлари матбуот котиби Иллия Евлаш сўнгги ракета ҳужуми ҳақида қисқача баёнот эълон қилган. Унга кўра, Россия Одессага учта “Искендер-М” баллистик ракетаси билан ҳужум қилган.
Душман Одесса шаҳрини асосий нишон сифатида танлади. У Одессанинг аҳоли зич жойлашган ҳудудларига учта “Искандер-М” баллистик ракетаси билан ҳужум қилди, одамларни ўлдирди ва ярадор қилди, — деган Иллия Евлаш.
Изоҳ (0)