Одессада уч ойлик қизчанинг дафн маросими. Харьковдаги ёнғин ва Донбассдаги бункерлар. Урушнинг 63-кунидан фоторепортаж
Украинадаги урушнинг олтмиш учинчи куни якунланди. Одессада 23 апрель кунги ҳужумда ҳалок бўлганлар билан видолашув маросими ўтказилди. Россия Запорожьедаги позицияларини яхшилашга ҳаракат қилмоқда, аммо йўқотишларга учрамоқда. Донбассда жанглар давом этмоқда. Украина томони Россияни Северодонецкдаги шаҳар касалхонасини ўққа тутишда ва Донецк вилоятида фосфорли қуроллардан фойдаланганликда айбламоқда. Meduza манбаларининг хабар қилишича, май ойи ўрталарида Донецк ва Луганскда Россияга қўшилиш, Херсон вилоятида эса Херсон халқ республикасини ташкил этиш бўйича референдум ўтказиш режалаштирилмоқда.
Одесса
Уч ойлик Кира Глодан, онаси Валерия ва бувиси Людмиланинг дафн маросими. Улар 23 апрель куни Одессадаги турар жой биносига қилинган ракета ҳужуми оқибатида ҳалок бўлган. Россия Мудофаа вазирлиги зарба нишони ҳарбий объект бўлганини даъво қилмоқда.Фото: EPA
Чернигов вилояти
Лукашовка қишлоғида вайрон бўлган черков. Маҳаллий аҳоли вакилларининг сўзларига кўра, россиялик ҳарбийлар ундан ўқ-дори омборхонаси сифатида фойдаланган.Фото: Reuters
Количовка қишлоғида яшовчи Фадей исмли бола Россия армияси қолдириб кетган ҳарбий юк машинаси ичида ўйнамоқда.Фото: Reuters
Запароже вилояти
Фронт чизиғида жойлашган Гуляйполе шаҳридаги уйда украиналик аскарнинг қуроли. Запорожье вилоятининг босиб олинган ҳудудларида россиялик ҳарбийлар Украина хавфсизлик кучлари вакиллари яшаган (ёки яшаётган) жойларни топиш учун уйларни тинтув қилиб чиқмоқда.Фото: EPA
Фронт чизиғи яқинидаги дарахт остида дам олаётган украиналик аскар. Украина Қуролли кучларининг кечки ҳисоботига кўра, Россия Запорожье йўналишида ўз қўшинларининг тактик позициясини яхшилашга уринган, аммо якунда қўшинлар йўқотишлар билан чекинган.Фото: Getty Images
Харьков
Маҳаллий аҳоли тез ёрдам ходимига ярадорни ташишда ёрдам бермоқда. Россия қўшинлари Харьков ва вилоятнинг аҳоли турар жойларига артиллерия ва миномётлардан зарба беришда давом этмоқда. Вилоят ҳарбий бошқармаси бошлиғи Олег Синегубовнинг сўзларига кўра, 27 апрелга ўтар кечаси қилинган ҳужумда 3 киши ҳалок бўлган, 15 киши яраланган.Фото: AP Photo
Харьков почтахонаси олдида гуманитар ёрдам учун навбат.Фото: Getty Images
Донбасс шимоли
Ямпол шаҳри яқинида Украинанинг Су-25 самолёти Россия ҳужуми пайтида ҳимояланиш учун иссиқлик тузоқларини чиқармоқда. Ямпол Лиман йўналишида жойлашган бўлиб, у ерда Россия олдинга силжимоқда: масалан, Россия армияси Краматорск туманидаги Заречное аҳоли пункти устидан аллақачон назорат ўрнатган.Фото: AFP
Украина ҳарбийлари рус қўшинлари билан жангдан сўнг танкни таъмирлаб, унга автомат ўрнатмоқда.Фото: AP Photo
Украина ҳарбийлари «Град» баравар ўт очувчи ракета тизимидан ўқ узмоқда. Украина Қуролли кучлари маълумотларига кўра, Россия Донецк ва Луганск вилоятлари ҳудуди устидан тўлиқ назорат ўрнатиш ва Қрим билан қуруқлик йўлаги яратиш учун олдинга силжишда давом этмоқда.Фото: Reuters
Северодонецкда одамлар бункерга кирмоқда. Луганск вилояти раҳбари Сергей Гайдайнинг сўзларига кўра, Россия Северодонецкдаги шифохонани ўққа тутган. Гайдайнинг айтишича, рус қўшинлари касалхонада одамлар борлигини биларди, аммо «бу уларни тўхтата олмади». Бир аёл вафот этган.Фото: AFP
Изоҳ (0)