Макияж бу фақат брендлар ва сифатли косметика масаласи эмас, балки терини тайёрлаш, мос текстура танлаш ва тўғри суртиш техникасидан фойдаланишга ҳам боғлиқ. Терининг тури ва ҳаёт тарзини ҳисобга олиш муҳим. Макияжнинг тез йўқолишига терининг ўзига хослиги ва нотўғри тайёргарлик сабаб бўлиши мумкин, лекин буларни тузатиш имкони бор.
Терини макияжга тайёрламаслик
Тонал кремни намловчи восита ишлатмасдан суртиш тавсия этилмайди. Акс ҳолда у терининг барча қуруқ жойларига кириб қолади, қатлам ва нотекисликларни янада яққол кўрсатиб қўяди. Натижада макияж тезда янгилигини йўқотади, нотекис ётади ва атиги бир соат ичида ўзгариб қолади.
Макияжни суртишдан олдин, албатта, намловчи крем ёки сивороткани қўлланг ва уларнинг терига сингиши учун камида 5–10 дақиқа кутинг. Бу терини силлиқ қилади ва тонал кремни янада текис суртиш ҳамда узоқроқ сақланишига ёрдам беради.
Нотўғри танланган текстуралар
Ҳаддан ташқари зич ёки ёғли тонал кремлар фаол ёғ ажратувчи терида яхши ушланмайди. Қуруқ терида эса кукунли воситалар тезда кўзга ташланади ва қуриган жойларни янада кўпроқ таъкидлаб кўрсатади.
Тонал воситани тери турига қараб танланг. Ёғли тери учун — мат ёки узоқ сақланадиган суюқ тонал крем, қуруқ тери учун — намловчи тонал-крем тавсия қилинади. Аралаш тери учун эса алоҳида ёндашув керак: Т-зонага матлаштирувчи база, қолган қисмга эса оддий тонал крем қўлланг.
Фиксациясиз қатламлар
Агар сиз тонал крем, консилер, упа ва кремли румяналарни мустаҳкамловчи воситаларсиз суртадиган бўлсангиз, макияжингиз на қўл текизишга, на нам ҳавога бардош бера олади. Айниқса, кремли текстуралар ёки бир неча маҳсулотни кетма-кет ишлатганингизда ҳар бир қатламни енгил фиксация қилиш муҳим бўлади.
Ҳар бир нам маҳсулотдан сўнг (масалан, тонал крем ёки консилер) уни енгил қилиб упа билан мустаҳкамлаш тавсия этилади. Якунда эса махсус фиксацияловчи спрейдан фойдаланинг.
Юқори намлик ёки фаол турмуш тарзи
Транспортда юриш, кондиционерли жойларда бўлиш, дўкон кезиш ёки шунчаки иссиқ кунлар — буларнинг барчаси макияжнинг узоқ туришига таъсир қилади. Тери намлик ва ёғни фаол ажрата бошлайди, натижада косметика оқиб кетади, тонал крем эса тешикчалар ичига кириб кетади ёки бурун ва иякдан бутунлай ўчиб кетади. Энг узоқ сақланадиган макияж ҳам бундай шароитларда ўз шаклини йўқотади.
Шундай ҳолатлар юз бермаслиги учун, айниқса, тонал крем, туш ва тен танлашда сувга чидамлилигига ва тезда ўчиб кетмаслигига эътибор беринг.
Ёнингизда ҳар доим матлаштирувчи салфеткалар ва ихчам упа бўлсин. Улар ёрдамида юзга ортиқча нарса суртмасдан макияжни тезда тартибга келтириш мумкин.
Макияж доим юзда оқиб кетса, нима қилиш керак?
Юз терисини тайёрлаш ва макияжни кетма-кет суртиш тартибида кичик ўзгаришлар киритиш макияжни кун бўйи янгидек ва тартибли кўринишда сақлашга ёрдам беради:
Қатламлар сонини камайтиринг. Қанча кўп бўлса, оқиб кетиш хавфи шунча ошади. Терининг нафас олишига имкон беринг.
Узоқ вақт сақланадиган кремли текстураларни танланг. Кремли тенлар, румяналар ва лаб бўёқларини ингичка қатламда суртиб, устидан упа билан мустаҳкамланса, узоқроқ туради.
Макияжни нам эмас, қуруқ терига суртинг. Намлик фиксацияга халақит беради.
Бармоқлар ўрнига чўтка ишлатинг. Шу йўл билан пардоз воситалари ингичка ва бир текис ётади.
Тонал кремни фақат ингичка қатламда суртинг. Юз — расм чизадиган жой эмас. Енгил қоплама қанча кам бўлса, шунча узоқ туради.
Иссиқ мавсумда фиксацияловчи спрейдан фойдаланинг.
Узоқ сақланадиган макияж сири — комплекс ёндашувда. Парваришни қайта кўриб чиқинг — кўпроқ намловчи, енгил тозаловчи воситаларни қўшинг ва тери мувозанатини сақланг. Макияжни тизимли тарзда яратинг: парвариш — база — тонал крем — фиксация. Шунда сизнинг ойнадаги аксингиз нафақат эрталаб, балки кечқурун ҳам кўзни қувонтиради.
Изоҳ (0)