Италиянинг “Рома” клуби 28 ёшли кот-д’Ивуарлик ярим ҳимоячи Франк Кессиэни ўз таркибга қўшиб олишни истамоқда. Бу ҳақда таниқли инсайдер Жанлука Ди Марцио хабар берди.
Ҳозирда трансфер ҳақида бошқа маълумотлар ошкор қилинмаган. Бироқ “Рома”нинг янги устози Жан Пьеро Гасперини футболчини ўз жамоасида кўрмоқчи эканлиги ва у орқали ярим ҳимоя чизиғидаги муаммони бартараф этишни истаётгани ҳақида хабарлар тарқалди.
Айни пайт Кессиэ Саудия Арабистони чемпионатининг “Ал-Аҳли” жамоаси сафида тўп сурмоқда. Футболчининг жиддаликлар билан шартномаси 2026 йил июнь ойига қадар амал қилади.
Франк учун А Серия бегона эмас. Чунки у Саудия Арабистонига йўл олгунига қадар “Милан” шарафини ҳимоя қилган. Шунингдек, Кессиэ бироз вақт Катaлониянинг “Барселона” клубида ҳам ўйнаган.
Маълумот учун, ўтган мавсум Франк Кессиэ “Ал-Аҳли” сафида 44 та ўйинда майдонга тушиб, ўз ҳисобига 4 та гол ва 5 та голли узатма ёздириб қўйган. Transfermarkt портали футболчининг қийматини 14 миллион еврога баҳоламоқда.
Изоҳ (0)