Чемпионлик масаласи деярли ҳал бўлган А Серия ва Ла Лига, Германияда янги етакчи, Англияда устоз-шогирд кураши. Топ-5 лигалар жадвалидаги ҳолат ҳақида
Март ойидаги ФИФА кунлари сабаб клуб футболи, хусусан, Европа топ-5 лигаларида ҳам мусобақалар танаффусга чиқди. Мавсумнинг сўнгги чораги олдидан топ-5 лигалар мусобақа жадвалига аҳвол қандай? Ушбу саҳифада шу ҳақида сўз боради.
АПЛ. Чемпионлик учун курашаётган устоз-шогирд ва ЕЧЛ йўлланмаси учун “қонли жанг”
Премьер Лигада “Арсенал” битта ўйин кам ўтказган таъқибчи “Манчестер Сити”дан 8 очко олдинда. Мусобақа тугашига 10 тур қолганини инобатга олса, мазкур фарқ яхшигина устунликдек кўриниши мумкин. Бироқ Микель Артета жамоасини “Ливерпуль”, “Челси” ва тўғридан тўғри рақобатчи “Манчестер Сити”га қарши ўйинлар кутиб турибди.
Дастлабки икки ўрин деярли аниқ бўлиб улгурган бўлса, Чемпионлар Лигасига йўлланма берадиган кейинги икки поғона учун яхшигина кураш кечмоқда. “Манчестер Юнайтед” очко йўқотишда давом этмаса нафақат топ-4 ликдаги жойини мустаҳкамлаши, балки чемпионлик учун ҳам ҳаракат қилиши мумкин. “Тоттенҳэм” ва “Ньюкасл”нинг беқарор натижалари сўнгги вақтларда анча ўзига келиб қолган “Ливерпуль”нинг топ-4 лик учун асосий даъвогарлар қаторига қайтишига сабаб бўлди.
Англия олий дивизионида жон сақлаб қолиш учун курашаётган жамоалар рақобати ҳам бу мавсум ўзгача. Яққол аутсайдер йўқ, 12-ўриндаги жамоа сўнгги поғонадаги клубдан бор-йўғи 4 очко олдинда.
Ла Лига. Интригани “кўмган” класико, ўз ўйинини топиб олган “Атлетико”
Танаффус олдидан ўтказилган турнинг сўнгги ўйинида “Барселона” таъқибчиси “Реал”ни мағлуб этиб, орадаги фарқни 12 очкога етказди. Хави жамоаси жорий мавсум бор-йўғи 9 та гол ўтказиб юборганини инобатга олсак, кейинги 12 тур давомида 13-14 очко йўқотишига ишониш қийин.
Охирги олтита турни олганда “Атлетико” энг яхши натижа қайд этмоқда. Бу оралиқда “Эл Чоло” шогирдлари фақат Мадрид дербисида дуранг ўйнади ва қолган барча учрашувларни ғалаба билан якунлади.
А Серия. “Наполи” гегемонияси ва кутилмаган таъқибчи
Мавсум аввалида мусобақанинг сўнгги турларига келиб “Наполи” яққол пешқадамлик қилади, унинг энг яқин таъқибчиси эса “Лацио” бўлади дейилса ҳеч ким ишонмасди. Лучано Спалетти қўл остидаги жамоанинг мавсум давомидаги барқарор ўйини, Милан жамоаларнинг сустлашгани ва “Ювентус” атрофидаги воқеалар А Серия жорий мавсумини сўнгги йиллардаги энг ноодатий мусобақага айлантирмоқда.
Мавсум тугашига 11 тур қолганда “Наполи” 19 очколик фарқ билан чемпионлик масаласини деярли ҳал қилди. Интрига фақат кейинги уч ўрин учун курашда қолди. Милан шаҳри жамоалари, “Рома” ва “Аталанта”нинг сўнгги турлардаги кетма-кет очко йўқотишидан унумли фойдаланган “Лацио” иккинчи ўринга кўтарилиб олди. 15 очкодан маҳрум қилиниб, қуйи ўринларга тушиб кетган “Ювентус” ҳам топ-4 ликка яқинлашиб қолди.
Элдор Шомуродовнинг “Специя”си эса лигада қолиш учун курашмоқда.
Бундеслига. Етакчиликни қўлдан чиқарган “Бавария”, йилни кўтаринки ўтказаётган “Боруссия Д”
ФИФА кунлари олдидан ўтказилган турда “Бавария” Хаби Алонсо бошчилигидаги “Байер”га ютқазиб қўйди ва дортмундликларни ўтказиб юборди.
“Боруссия” қишки танаффусдан кейин лигада бирор марта ютқазмади — 9 ғалаба ва Рур дербисидаги 1 дуранг. Мазкур серия эвазига “арилар” пешқадамга айланиб олди. ЖЧ—2022 дан олдин Дормунд жамоаси етакчи “Бавария”дан 9 очко ортда қолган ҳолда, 6-поғонада бораётганди.
Лига 1. “ПСЖ” ва бошқалар
Франция чемпионатида одатий тусга айланган вазият: Париж жамоаси яққол пешқадам, қолган ўринлар учун аёвсиз кураш.
“ПСЖ” таъқибчи “Марсель”ни 7 очкога ортда қолдирмоқда. Бироқ Кристоф Гальтье шогирдлари танаффусга ёмон кайфиятга йўл олди. 28-турда жамоа “Ренн”га мағлуб бўлди.
