Футбол бўйича 2022/23 йилги мавсум қишки трансферлар ойнаси якунланди. Январь ойи натижаларидан барча клуб ва футболчилар қониқиш ҳосил қилмади. Кўплаб трансферлар муваффақиятли амалга оширилган бўлса-да, баъзи келишувлар фақат оғзакилигича қолди. Қуйида январь ойида амалга ошиши кутилган, бироқ натижасиз тугаган трансферлар ҳақида сўз боради.
Милан Шкриньяр (“ПСЖ”га ўта олмади)
“Интер” ҳимоячиси Милан Шкриньярнинг ниҳоясига етаётган шартномаси ҳисобга олинса, унинг “ПСЖ”га ўтиши аниқдек туюлганди. Парижликлар ҳам 27 ёшли футболчини ўз сафига қўшиб олмоқчилигини яширмади. Шкриньярнинг ўзи клублар музокара ўтказаётганини тасдиқлади. Словакиялик футболчи бир оёғи билан “Парк де Пренс”да эди. Лекин ушбу трансфер амалга ошмади. “Нераззури” унинг ўрнига муносиб ўринбосар топа олмагани учун Миланни қўйиб юбормади. Ушбу ҳикоя ижобий якун топмади: Франция чемпиони ҳимоячини қўлдан чиқарди, Шкриньярдан эса “Интер”даги сардорлик боғичи олиб қўйилди.
Софян Амрабат (“Барселона”га ўта олмади)
“Фиорентина” ярим ҳимоячиси Софян Амрабатнинг “Барселона”га ўтиши билан боғлиқ вазият қисқа метражли фильмни ёдга солади. Италия клуби спорт директори Даниэль Праденинг сўзларига кўра, барча эрталаб соат 10:00 да бошланиб, ярим тунда ўз ниҳоясига етган. Футболчи “Барселона”га ўтиш учун машғулотларда иштирок этишдан бош тортганидан сўнг “Фиорентина” ҳам уни таркибдан четлаштирган. Бироқ трансфер амалга ошмагач, Амрабат узр сўраган.
Хулиан Араухо (“Барселона”га ўта олмади)
Трансфер ойнаси якунланиши арафасида каталонияликлар Эктор Белеринни “Спортинг”га қўйиб юборди. “Кўк-анорранглилар” унинг ўрнини “Лос-Анжелес Гэлакси” ҳимоячиси Хулиан Араухо билан тўлдиришни мақсад қилган эди. Томонлар музокараларни якунлаган, барчаси келишилган эди, бироқ трансфер амалга ошмади. Каталонлар трансферни расмийлаштиришга 18 сонияга кечикди ва 21 ёшли иқтидор эгасидан қуруқ қолди. Худди шунга ўхшаш вазият 2017 йилда “Лестер” билан ҳам содир бўлганди. Ўшанда “тулкилар” Адриэн Сильванинг трансферини расмийлаштиришга 14 сония кечикканди. Иккала вазиятда ҳам ФИФА трансферларни рўйхатга олмаган.
Николо Заниоло (“Милан”га ўта олмади)
“Рома” ярим ҳимоячиси Николо Заниоло билан боғлиқ вазият қишки трансфер ойнасида Италияда энг кўп муҳокама қилинди. Футболчи Рим клубини тарк этишини маълум қилди, лекин якунда ҳеч қаерга кета олмади. 23 ёшли футболчини қўлга киритиш учун “Милан” ва “Борнмут” асосий даъвогар эди. Футболчи “россонери” таркибига ўтмоқчи эди, миш-мишларга қараганда, оғзаки келишув ҳам амалга ошган. Лекин инглизлар римликларга яхшироқ таклиф билан чиққан. Италиялик эса АПЛнинг аутсайдери таркибига ўтишдан бош тортган. Заниоло охирида раҳбарият томонидан танқид ва мухлислар ғазабидан бошқа нарсага эришмади.
Николо барибир “Рома”ни тарк этди ҳамда Туркиянинг “Галатасарой” жамоаси билан шартнома имзолади.
Ҳаким Зиёш (“ПСЖ”га ўта олмади)
Қишки трансфер ойнасида парижликларнинг омади келмади. Дастлаб, “Интер”дан Шкриньяр трансфери учун рад жавобини олган бўлса, кейинчалик “Челси” вингери Ҳаким Зиёш билан ҳам шартнома имзолай олмади. “ПСЖ” барчасига “аристократлар” айбдорлиги борасида баёнот берди. Лондонликлар “Бенфика” аъзоси Энсо Фернандес трансферига диққатини қаратиб, парижликларга Зиёшнинг трансфери бўйича нотўғри расмийлаштирилган ҳужжатларни юборган. Инглизлар барча ҳужжатларни тўғрилаганда эса кеч бўлган. Грем Поттер қўл остида ўйин амалиётига эга бўлаётганига қарамасдан марокашлик футболчи ҳамон “Челси”ни тарк этиш ниятида.
Мойсес Кайседо (“Арсенал”га ўта олмади)
“Арсенал” январь ойида “Брайтон” вингери Леандро Троссардни 24 миллион евро эвазига харид қилди. Футболчининг бош мураббий Роберто де Зерби билан зиддиятга боргани трансфер тезроқ амалга ошишига туртки бўлди. “Канонирлар” трансфер ойнасига якунланиши арафасида “чайкалар”нинг яна бир футболчиси Мойсес Кайседони ҳам ўз сафига қўшиб олмоқчи эди. “Арсенал” 21 ёшли хавбек учун Троссардга тўлаган пулидан кўпроқ нарх таклиф қилган. Бироқ “Брайтон”ни бу қониқтирмаган. Эквадорлик футболчи ижтимоий тармоқларда мухлислар билан хайрлашишга ишора ҳам қилаётган эди. Де Зерби Кайседо жамоанинг муҳим футболчиси эканлигини таъкидлаганидан сўнг раҳбарият мутахассиснинг айтганини қилишга қарор қилди.
Янник-Ferreйра Карраско (“Барселона”га ўта олмади)
Каталонияликларнинг қишдаги асосий мақсадларидан бири “Атлетико” футболчиси Янник Карраскони ўз сафига қўшиб олиш эди. Дастлаб, “кўк-анорранглилар” Мемфис Депай трансферига Карраскони қўшишни таклиф қилди, бироқ “матрасчилар” буни рад этди. “Барселона” 29 ёшли белгияликни сотиб олишга ҳам тайёр эди, лекин бу ҳам амалга ошмади. Карраско ҳам “Барселона” сафига ўтишга розилигини билдирган эди. Ушбу трансфер ёзда амалга ошиши мумкин.
Изоҳ (0)