Ўзбекистон терма жамоаси ва Италиянинг “Рома” клуби ҳужумчиси Элдор Шомуродов яқин орада римликлар сафини тарк этиши мумкин. Romaforever нашрининг хабарига кўра, унга А Сериянинг бошқа бир клуби — “Кремонезе” жиддий қизиқиш билдирмоқда.
Аввалроқ оммавий ахборот воситаларида Шомуродовга бир нечта клублар томонидан жиддий қизиқиш бўлаётгани ҳақида хабарлар тарқалган эди. Хусусан, Франциянинг “Ренн” ҳамда Туркиянинг “Истанбул Башакшеҳир” клублари ўзбекистонлик футболчини ўз сафига қўшиб олиш ниятида.
Romaforever нашрининг ёзишича, “Кремонезе” А Серияда қатнашиш ҳуқуқини қўлга киритгани сабабли, Шомуродов трансфери учун курашга қўшилган.
Яна бир нашр — Sportitalia маълумотига кўра, “Кремонезе” Элдор Шомуродовни қўлга киритиш борасида аниқ ва жиддий ҳаракатларни бошлаб юборган. Клуб А Сериядаги ўз ўрнини сақлаб қолиш учун таркибни кучайтиришга қатъий бел боғлаган ва Шомуродовни ҳужум чизиғини мустаҳкамлаш учун идеал номзод сифатида кўрмоқда.
“Рома” клуби эса Шомуродовни сотишга қарши эмас. Бунинг сабаби — клуб 30 июнгача айрим футболчиларни трансфер қилиб, молиявий балансни тиклашдан иборат. Бу УЕФА билан тузилган “дўстона келишув” доирасидаги шартлар билан боғлиқ. Сабаби, бир неча йил аввал “бўрилар” молиявий фейр-плей талабларини бузган эди. Клубни тарк этиши мумкин бўлган асосий номлардан бири айнан Элдор Шомуродов саналмоқда. Римликлар ўзбекистонлик ҳужумчини тахминан 7 миллион еврога трансфер қилишни режалаштирмоқда.
Эслатиб ўтамиз, Элдор Шомуродов ўтган мавсум турли мусобақалар доирасида 37 ўйинда майдонга тушиб, 7 та гол урди ва 5 та голли узатма амалга оширди. Унинг “Рома” клуби билан шартномаси 2026 йилнинг ёзига қадар амал қилади. Transfermarkt портали маълумотига кўра, футболчининг ҳозирги трансфер қиймати 5 миллион еврога тенг.
Изоҳ (0)