Жанубий Корея дорамалари кўплаб томошабинлар учун бу қизиқарли Осиё мамлакатининг тарихи, урф-одатлари ва турмуш тарзини ўрганиш воситасига айланди. Бироқ ҳар қандай бадиий асар каби улар ҳам кўпинча воқеликни керакли драматик ҳикоя яратиш учун ўзгартириб кўрсатади.
1. Сохта қашшоқлик
Корейс дорамаларининг кўплаб қаҳрамонлари оғир молиявий аҳволга тушиб қолган камбағал оилалардан чиққан. Персонажларнинг камбағаллиги уларнинг ташқи қиёфаси ва характерларини шакллантиришда муҳим рол ўйнайди. Молиявий аҳволни яхшилашга интилиш, бой оила аъзоси билан танишиш ёки катта миқдордаги пулни зудлик билан тўлаш зарурати сюжет ривожланишининг асосий воситаларига айланади. Жанубий Кореяда бой ва камбағаллар, йирик ва кичик бизнес ўртасида кучли ижтимоий фарқ мавжуд. Айниқса, 1997-1998 йиллардаги Осиё молиявий инқирози ва унинг оқибатида амалга оширилган иқтисодий ислоҳотлардан сўнг бу ҳолат яққол сезила бошлади. Кам таъминланган кишиларнинг кўпинча корейс жамияти томонидан камситилиши вазиятни янада оғирлаштиради.
Шундай қилиб, ижтимоий тенгсизлик кучли драматик тўқнашувни яратиш учун чиндан ҳам мустаҳкам асос бўлиб, буни “Оскар”га сазовор бўлган “Паразитлар” фильми исботлади. Бироқ корейс сериалларида қашшоқлик кўпинча ғалати тарзда тасвирланади. Масалан, машҳур “Меросхўрлар” сериали сюжетига кўра, бош қаҳрамон Ча Ин-сан уй хизматчиси бўлиб ишлайдиган онаси билан яшайди ва фақат тирикчилик учун етарли бўлган турли хил қўшимча ишлар билан шуғулланади. Аммо экранда томошабин бутунлай бошқача манзарани кўради: Ча Ин-сан тез-тез қимматбаҳо кийимлар, пойабзал ва бренд рюкзагини кийиб юради. Унинг содда жиҳозланган хонадони замонавий қимматбаҳо мебеллар билан безатилган. Яна бир мисол “Ҳақиқий гўзаллик” романтик сериали бош қаҳрамони, ўрта мактаб ўқувчиси Лим Жу-гёндир. У оддий камбағал оиладан бўлишига ва фақат мактабда ўқишига қарамай, қиммат косметикага маблағ топади ва энг сўнгги русумли смартфондан фойдаланади.
Дорамалардаги қашшоқликнинг сохталиги кўпинча машҳур корейс электроника ишлаб чиқарувчилари, йирик косметика компаниялари ёки халқаро автомобиль концернлари ҳамда кийим ишлаб чиқарувчилар билан тузилган реклама шартномалари туфайли юзага келади. Қаҳрамонларнинг жозибали ташқи кўриниши, доимо чиройли турмакланган сочлари ва яхши кийимлари бунга мисол бўлади. Жанубий Кореянинг кўплаб оддий фуқаролари аслида камбағал кўринмасликка интилади, шу сабабли ташқи кўринишларига кўп маблағ сарфлайди.
2. Золушкалар шаҳзодаларни учратмайди
Корейс романтик дорамаларининг энг кўп учрайдиган сюжетларидан бири камбағал қиз ва бой йигит ўртасидаги муносабатлардир. Золушка ва келишган шаҳзодалар ҳақидаги ҳикояларнинг энг машҳур даври 2008-2013 йилларга тўғри келган бўлса-да, улар ҳозир ҳам учраб туради ва катта қизиқиш уйғотмоқда. Кўпинча шаҳзодалар Жанубий Кореянинг йирик корпорацияларининг меросхўрлари сифатида тасвирланади. Бир оила томонидан бошқариладиган бундай йирик молия-саноат конгломератлари “чебол” деб аталади. Чебол ҳодисаси Жанубий Кореяда Корея уруши тугаганидан сўнг пайдо бўлган ва ҳозирги кунда ҳам мавжуд бўлиб, мамлакат иқтисодиётининг муҳим қисмини ташкил этади. Энг машҳур чеболлар қаторига Samsung, LG, Hyundai киради.
Аммо бунинг учун сиз ҳам бадавлат ва нуфузли шахс бўлишингиз керак бўлади. Жанубий Корея ҳамон иерархия муҳим ўрин тутадиган мамлакат ҳисобланади. Оилаларда катталарга сўзсиз бўйсуниш одат тусига кирган, иш жойида эса ҳатто раҳбарларнинг энг ғалати қарорларига ҳам эътироз билдириш ёки ўзгача фикр билдириш одатда қабул қилинмаган. Бадавлат корейслар кўпинча ўзларига ўхшаган бой одамлар даврасида бўлишади. Улар элита мактабларида таълим олишади, кейин эса нуфузли ва кўпинча чет эл университетларига ўқишга киришади.
Кўпчилик бой кореяликлар учун ижтимоий мавқейини сақлаш муҳим, шунинг учун уларнинг турмуш ўртоғи ҳам шу даражага мос келиши шарт. Шу боисдан амалда Samsung корпорацияси асосчисининг набираси Ли Же-ён Даэсанг Group корпорацияси раис ўринбосарининг қизига уйланган. Кўп ҳолларда бу иккала томон учун фойдали бўлган корпоратив никоҳ ҳисобланади ва бунда муҳаббатнинг ҳеч қандай аҳамияти йўқ.
Сўнгги ўн йилликда Золушкалар, “қийин аҳволга тушган қизлар” ва ҳаддан ташқари ҳиссиётли камбағал содда қизлар ўрнини мақсадга интилувчан, мустақил, шижоатли ва ўзига ишонган аёл қаҳрамонлар эгаллади. Масалан, “Қидирув: WWW”, “Яхши ҳамкор” ёки “Агентлик” драмаларида аёллар муваффақиятли карьера қуриб, турли компанияларни бошқармоқда ва ўз соҳасининг ҳақиқий мутахассислари сифатида намоён бўлмоқда. Романтик муносабатлар ҳам тенг аҳамиятли бўлиб қолди. Уларда шошқалоқлик камайиб, юзага келган муаммоларни биргаликда ҳал қилишга бўлган онгли уринишлар кўпайди.
3. Жанубий Кореяда энг катта хавф — автомобиллардир
Дорамаларда энг кўп учрайдиган воқеалардан бири автоҳалокатлар эканлигини пайқаган бўлишингиз эҳтимол. Улар драманинг ҳаракатлантирувчи кучи сифатида қўлланилади: ота-оналарнинг вафоти, хотира йўқолиши ёки жиддий жароҳатлар. Бу сюжет оҳангини романтикдан фожиавийга ўзгартиришнинг осон усули ёки касалхонада парвариш қилиш орқали қаҳрамонларни бир-бирига яқинлаштиришнинг воситасидир. Корейсларнинг машҳур “Қиш сонатаси” ва “Жаннатга йўл” драмаларида бош қаҳрамонлар ҳалокат туфайли хотираларини йўқотиб, ҳаётларини тубдан ўзгартирадилар ва севгилисидан ажралишга мажбур бўлади.
Афсуски, бундай саҳналарга саволлар туғилади, чунки ҳайдовчилар кўпинча тормоз беришга уринмайди, енгил тўқнашувлар эса жуда оғир оқибатларга олиб келади. Шундай бўлса-да, корейс драмаларида бахтсиз ҳодисалар шунчалик кўпки, улар аллақачон классик клишелардан бирига айланган.
Аслида Жанубий Кореяда йўл-транспорт ҳодисалари ва ўлим кўрсаткичи бошқа ривожланган мамлакатларга нисбатан анча юқори бўлиб, бу ҳолат ҳукуматни ташвишга солмоқда. Шу сабабли ҳукумат фаол равишда бу кўрсаткичларни пасайтириш чораларини кўрмоқда. Масалан, кўпчилик кореялик ҳайдовчилар пиёдалар ўтиш жойида яшил чироқ ёниб турса ҳам, пиёдаларга йўл беришни хоҳламайди. Шунинг учун чет эллик сайёҳларга йўлни кесиб ўтишда алоҳида эҳтиёткор бўлиш тавсия этилади.
Шундай бўлса-да, сўнгги беш йил ичида йўллардаги ўлим даражаси 80 фоизга камайди ва ҳозирда Жанубий Корея Иқтисодий ҳамкорлик ва тараққиёт ташкилотининг 38 та аъзо давлати орасида бу кўрсаткич бўйича 9-ўринни эгаллади. Демак, драмаларда оддий, аммо таъсирчан драматик усул сифатида қўлланиладиган автоҳалокатлар маълум даражада Кореяда мавжуд йўл ҳаракати муаммоларини акс эттиради.
4. Жанубий Кореянинг қоронғи томони
Ёрқин ва жозибали романтикадан фарқли ўлароқ, корейс детективлари кўпинча Жанубий Кореянинг қоронғи томонини кўрсатишга интилади. Ҳатто кўплаб шафқатсиз триллерлари бор йирик Ғарб стриминг хизматлари пайдо бўлишидан олдин ҳам, Кореянинг ОCН канали ваҳимали детективларга ихтисослашган эди. Ёмғир, қоронғи тор кўчалар, шафқатсиз қотилликлар, хавфли секталар ва жиноятчиларнинг ҳукм суриши. Таранглик ҳаддан ошиб, баданингиз жимирлаб кетади. Детектив ва триллерлардаги Жанубий Корея - ҳар қадамда хавф пойлаб турган ниҳоятда қоронғи жойдир.
Аслида Жанубий Кореяда зўравонлик жиноятлари ва ўғриликлар ривожланган мамлакатлар орасида энг паст кўрсаткичлардан биридир. Полициянинг самарали иши ва видеокузатув камераларининг кенг жорий этилиши кўча жиноятчилигининг камайишига олиб келди.
Шафқатсиз мафия урушлари 1990 ва 2000 йилларда қолиб кетган бўлиб, ҳозирда Корея мафияси кўпинча қонуний бизнес ниқоби остида яширин фаолият юритмоқда. Бу ҳолат, масалан, “Жаҳлдор руҳоний”, “Винченсо” ёки “Таксичи” каби драмаларда яхши акс эттирилган. Кўчалардаги хавфсизлик яхши бўлса-да, йилдан йилга кибержиноятлар, оилавий зўравонлик ва ўсмирлар тажовузкорлиги ҳолатлари сони ортиб бормоқда. Шу нуқтайи назардан, масалан, мактабдаги буллингга бағишланган кўплаб лойиҳалар Корея жамиятининг долзарб ижтимоий муаммоларидан бирини ҳақиқатан ҳам акс эттиради. Коррупция ҳам Жанубий Корея драмалари ва реал ҳаётининг ажралмас қисми бўлиб қолмоқда.
Изоҳ (0)