Хитойнинг бўлажак ташқи ишлар вазири сифатида кўрилган дипломат Лю Сзянчао июль ойида хорижий сафардан қайтгач, ғойиб бўлди. Бу ҳақда манбаларга таяниб, The Wall Street Journal хабар берди.
Амалдор Пекинга етиб келиши биланоқ сўроққа олиб кетилган. Шундан сўнг омма олдида кўриниш бермаган. Хитой расмий идоралари вазиятга изоҳ бермаяпти. Лю илгари Хитой Коммунистик партияси Марказий қўмитасининг Халқаро бўлимига раҳбарлик қилган ва ташқи сиёсий мулоқотларда фаол иштирок этган.
У яқинда Сингапур, Жазоир, Жанубий Африка ҳамда АҚШга ташриф буюриб, Байден маъмурияти ва таҳлил марказлари вакиллари билан учрашганди. Ҳатто давлат котиби Энтони Блинкен билан музокара олиб борган. Ўшанда америкалик амалдорлар уни “буюк ишлар кутмоқда” деб баҳолаган эди.
Аммо Хитой ичида бундай баҳолар турлича қарши олинган. Пекин норасмий равишда Люнинг лавозимидан четлаштирилган вазир Син Ганнинг ўрнини эгаллаши мумкинлиги ҳақидаги фикрларни танқид қилган. Син Ганнинг карьераси шов-шувли “ички тергов”дан сўнг якунланган эди.
Люнинг ғойиб бўлиши сўнгги йилларда Хитойнинг юқори мартабали амалдорларини сирли тарзда лавозимдан четлаштириш ҳолатларига мос келади. Таҳлилчилар буни партия ичида назорат кучайгани билан изоҳламоқда.
Изоҳ (0)