Ўзбекистон терма жамоаси сардори ва Римнинг “Рома” клуби ҳужумчиси Элдор Шомуродов Истанбулнинг “Башакшеҳир” клуби билан шартнома имзолаш учун Туркияга етиб борди. Бу ҳақда журналист Якуб Чинор ўзининг Х (собиқ Twitter) саҳифасида маълум қилди.
Манбага кўра, Шомуродов айни пайтда Истанбулда бўлиб турибди. У клуб билан ҳар томонлама келишувга эришган, яқин кунларда расмий шартнома имзоланиши кутилмоқда.
Аввалроқ Туркиянинг Gazetaarena нашри “Башакшеҳир” Элдорга жиддий қизиқиш билдираётгани борасида хабар тарқатган эди.
Рим клуби футболчининг кетишига қаршилик билдирмаяпти. Чунки Шомуродовнинг “Рома” билан шартномаси 2026 йилнинг ёзида якунланади. Шу боис клуб уни эркин агент сифатида жамоадан кетишини истамай, уни трансферга қўйган.
“Башакшеҳир” ушбу мавсум жамоани кучайтиришни мақсад қилган. Transfermarkt нашрига кўра, клуб нафақат Шомуродов, балки ўзбекистонлик бошқа футболчи — Аббосбек Файзуллаев учун ҳам таклиф билан чиққан. Шунингдек, Истанбул клуби “Қосимпошшо”дан Нуну да Костани ҳам ўз сафига қўшиб олмоқчи.
Изоҳ (0)