Ҳинд океанидаги Малдив ороллари мамлакати 13 май куни Жанубий Африка республикасининг Халқаро жиноят судидаги Исроилга қарши геноцид иши бўйича даъвосига қўшилганини маълум қилди. Бу ҳақда Al Jazeera нашри хабар берди.
Манбада айтилишича, Малдив ороллари ҳукумати Исроилни Ғазо секторида геноцид конвенцияси бўйича ўз мажбуриятларини бузганликда айблаган. Халқаро жиноят судида мамлакат Жанубий Африка билан битта позицияда туришини маълум қилган.
Малдив ороллари президенти администрацияси ушбу баёнотни расман тасдиқлаган ва эълон қилган. Исроилни мамлакат аҳолиси учун сунъий қўрқув муҳити яратиб, Ғазо аҳолиси ичида қирғин уюштиришда айблаган.
“Хавфсизлик ниқоби остида Исроил босқинчи кучлари томонидан амалга оширилган геноцид ҳаракатлари, оммавий кўчириш, очарчилик ва инсонпарварлик ёрдами тўсилиши ушбу қарорни имзолашга туртки бўлди”, — дейилади мамлакат расмийлари эълон қилган хабарда.
Малдив расмийлари, шунингдек, Исроилнинг Рафаҳга кенг кўламли ҳужумини ҳам қоралаган. Бошпана излаётган минглаб тинч аҳолини зудлик билан эвакуация қилиш талаблари Халқаро жиноят суди буюрган вақтинчалик чораларга амал қилинмаётганидан далолат эканлиги маълум қилинган.
Маълумот ўрнида, Малдив ороллари Ҳиндистондан жанубда, Ҳинд океанида жойлашган мамлакат. Ушбу ҳудуд мусулмонлар яшайдиган энг кичик давлат ҳисобланади. Мамлакат аҳолиси сони 500 мингдан кўпроқ экани айтилади. Мамлакат пойтахти Мале шаҳридир. Ушбу орол мамлакат 2020 йилдан кейинги даврда Ҳиндистон ва Хитой ўртасида иқтисодий ва ҳарбий ҳамкорлик учун кураш нуқтасига айланган.
Изоҳ (0)