Франциянинг Шри-Ланка ва Малдив оролларидаги элчиси 53 ёшли Жан-Франсуа Пакте Коломбодаги қароргоҳида ўлик ҳолда топилди. Бу ҳақда Шри-Ланка ташқи ишлар вазирлиги матбуот хизмати хабар берди.
Вазирлик воқеа муносабати билан чуқур ҳамдардлик билдирди, шунингдек, Франция Ташқи ишлар вазирлиги ва марҳумнинг оиласига ҳар томонлама ёрдам кўрсатишга ваъда берди. Баёнотда дипломатнинг ўлими сабаблари айтилмаган.
Полициянинг маҳаллий Ланкасара нашрига хабар беришича, дипломат ўз қароргоҳида вафот этган. 26 май куни эрталаб у одатдагидек ташқарига чиқмаган ва дипломатик миссия ходимлари билан боғланмаган. Якшанба дам олиш куни бўлгани учун элчихона ходимлари бир оз кутган, кейин эса полиция билан боғланишган. Қароргоҳга кирган полиция дипломатнинг жасадини зўравонлик изларисиз топган. Эҳтимол, дипломатнинг соғлиғи бирдан ёмонлашган бўлиши мумкин.
Жан-Франсуа Пакте 2022 йил октябрь ойидан буён Шри-Ланка ва Малдив оролларидаги Франция элчихонасини бошқариб келаётганди. Илгари у Франция Ташқи ишлар вазирлигида маданият ва таълим бўйича директор ўринбосари лавозимида ишлаб, хорижда француз тили ва маданияти марказлари тармоғини ривожлантиришга масъул бўлган.
2016 йилдан 2019 йилгача Пакте вазирликнинг глобал соғлиқни сақлаш, гендер тенглиги ва таълим сиёсати учун масъул бўлган ва Франциянинг ушбу соҳалардаги кўп томонлама фондларга ажратган маблағларини назорат қилган.
Изоҳ (0)