Малдив ҳукумати Хитой билан ҳарбий ёрдам тўғрисидаги шартномани имзолади. Бу ҳақда Anadolu нашри хабар берди.
Малдив ороллари президенти Муҳаммад Муиззу ўз мамлакатида ҳеч қандай ҳинд ҳарбийлари бўлмайди, деган позицияси сари қатъий ҳаракат қилмоқда. Ҳукумат бу мақсадига эришиш учун Хитой ёрдамида мудофаа тизимини кучайтирмоқчи.
Мамлакат Мудофаа вазирлигига кўра, мудофаа раҳбарияти бошлиғи Муҳаммад Ғассан Маумун ва Хитойнинг ҳарбий ҳамкорлик бўйича расмийси генерал майор Чжан Баоқун икки томонлама алоқаларни мустаҳкамлаган ҳолда “Хитойнинг Малдив оролларига бепул ҳарбий ёрдам кўрсатиши тўғрисида битим” имзолаган. Бу шартномага мувофиқ Хитой капитали ва техникаси Малдив ҳукумати ҳарбий соҳа ва тармоқларига йўналтирилади.
Хитой билан шартнома имзолангандан кейин Малдив расмийлари жиддий баёнот эълон қилган. Унга кўра, 10 майдан кейин мамлакат ҳудудида бирорта ҳам ҳинд ҳарбийси қолишига рухсат берилмайди. Ушбу санагача оролдаги барча ҳинд ҳарбий контингенти қитъага қайтган бўлиши керак.
Малдив ороллари олдинроқ Ҳиндистон ҳукуматидан 88 нафар аскарини оролдан олиб кетишини сўраган. Ҳиндистон эса бунга жавоб қайтармаган.
Изоҳ (0)