ҲАМАС гаровдагиларни озод қилиш учун шарт қўйди

ҲАМАС гуруҳи 10 нафар тирик ва 18 нафар вафот этган гаровдагилар жасадини Исроилга топшириш учун шарт қўйди. Бу ҳақда BBC хабар берди.

Маълум қилинишича, гаровдагилар Исроилдаги қамоқхоналарда сақланаётган фаластинлик маҳбуслар эвазига топширилиши мумкин. Айирбошлаш параметрлари АҚШнинг оташкесим таклифида мавжуд эди. Исроил бунга рози бўлган.

Аммо ҲАМАС буни амалга ошириш учун ўз позициясини илгари сурган. Жумладан, Исроилдан ўт очишни доимий тўхтатиш, Исроил қўшинларини Ғазодан тўлиқ олиб чиқиш ва гуманитар ёрдамнинг узлуксиз оқимини кафолатлаш талаб этилади. АҚШ томони буларнинг ҳеч бирини таклиф қилмаганди.

АҚШ президентининг махсус вакили Стив Уиткофф шартларни “мутлақо қабул қилиб бўлмайдиган” деб атади. 

ҲАМАС биз кейинги ҳафтада дарҳол бошлашимиз мумкин бўлган билвосита музокаралар учун асос сифатида илгари сурилган таклифни қабул қилиши лозим. Бу яқин кунларда 60 кунлик ўт очишни тўхтатиш келишувини якунлашимизнинг ягона йўли.

У тирик гаровга олинганларнинг ярмини ва ҳаётдан кўз юмганларнинг ярмини ўз оилаларига қайтаришга имкон беради. Шунингдек, бу билвосита музокараларда доимий ўт очишни тўхтатишга эришиш учун адолатли ва мазмунли муҳокамаларни бошлашни тақдим этади, деди Уиткофф.

Бунга жавобан Исроил бош вазири Бинямин Нетаняҳу идораси ўз баёнотини эълон қилди. Унда ҲАМАСнинг жавоби рад этиш сифатида талқин қилинган.

Исроил гаровга олинганларни озод қилиш учун Уиткоффнинг янгиланган режасига рози бўлган бир пайтда, ҲАМАС ўз раддиясида қатъий турибди. АҚШ президентининг Яқин Шарқ бўйича махсус вакили Стив Уиткофф айтганидек, ҲАМАСнинг жавоби қабул қилиб бўлмайди ва вазиятни орқага суради. Исроил гаровга олинганларни қайтариш ва ҲАМАСни мағлуб этиш бўйича ҳаракатларини давом эттиради, дейилади баёнотда.

ҲАМАС бунга жавобан АҚШ таклифини Исроил талқин қилганидек рад этмаганини маълум қилди. Гуруҳнинг юқори лавозимли вакили Басем Наимнинг айтишича, Исроилнинг муносабати томонларнинг мавжуд келишувларига зид бўлган.

У Уиткоффни адолатсизлик ва “тўлиқ тарафкашлик“да айблади. Хусусан, Америка элчиси Исроил тарафдори нуқтаи назаридан гапираётгани таъкидланди.