Ўзбекистон ва Венгрия вагонсозлик соҳасида биргаликда ишлаб чиқаришни йўлга қўйиш бўйича музокара олиб бормоқда. Бу ҳақда транспорт вазири ўринбосари Жасурбек Чориев “Ўзбекистон 24” телеканалига берган интервьюсида маълум қилди.
У мамлакат тадбиркор ва инвесторлари билан кечган учрашувлар Ўзбекистоннинг имконияти кенглини кўрсатишга туртки берганини таъкидлаб, транспорт соҳасида янги лойиҳалар амалга оширилишига ишонч билдирди.
“Темирйўл соҳасида Венгрия билан вагон ишлаб чиқариш, уларга эҳтиёт қисмларини етказиш, уларни Ўзбекистон ҳудудида ишлаб чиқариб, бошқа мамлакатларга экспорт қилиш бўйича ҳам музокара олиб боряпмиз”, деди Жасурбек Чориев.
Унинг қайд этишича, ўрта (Транскаспий) коридор очилиши, Хитой—Қирғизистон—Ўзбекистон темирйўли қурилиши инвесторларда Ўзбекистоннинг Марказий Осиёдаги стратегик ўрни муҳим эканлигини тушуниш имконини бермоқда. Венгрия томони билан инфратузилма яратиш ва хизматларни ташкил этишда ҳамкорлик қилиш бўйича тегишли ҳужжатлар имзоланди.
Транспорт вазири ўринбосари, шунингдек, авиация соҳасида юк ташувларини амалга ошириш масалалари ўрганилаётганини, қиш мавсумига келиб, томонлар ўзаро келишувга эришишини таъкидлади. Венгриялик инвесторлар билан Ўзбекистон ҳудудида логистика марказларини қуриш ва уларни ривожлантириш бўйича музокаралар олиб борилмоқда.
Изоҳ (0)