Тошкент йўловчи вагонларини таъмирлаш ва уларга хизмат кўрсатиш заводи йўловчиларни ташишга мўлжалланган янги вагонлар партиясини тайёрлади, деб хабар беради «Ўзбекистон темир йўллари» матбуот хизмати.
Шартномага кўра, жорий йилнинг охирига қадар жами 55 та йўловчи вагонлари тайёрланиб, топширилиши лозим. 2025 йилгача эса 300 та янги вагонларни эксплуатация қилиш режалаштирмоқда. Бу орқали Ўзбекистон йўловчи темирйўл составининг 70—80 фоизи янгиланади.
«Ўзтемирйўлйўловчи» вагонларини янгилаш концепциясига асосан, йилига турли типдаги камида 50 та янги вагон тайёрлаб етказилади. Ваҳоланки, 2009—2018 йиллар давомида йилига ўртача 18 та янги вагон таркибга қўшиб келинган.
«Умуман олганда, ҳар йили ўзимизда ишлаб чиқарилган бундай кўп сонли вагонларни қабул қилиб олиш – бу катта натижа. Йўловчи темирйўл транспорти хўжалигини ривожлантириш ва темирйўл транспортида йўловчилар ташуви ҳажмини ошириш учун мавжуд барча имкониятларни ишга соламиз», – дейди «Ўзтемирйўлйўловчи» АЖнинг маркетинг ва инновацияларни жорий этиш бўйича директори Суннатулло Ҳамидов.
Таъкидлаш керакки, янги вагонлар замонавий ойналар, светодиод чироқлар, иссиқ ва совуқ сув тизими, ёнғинга қарши сигнализация билан жиҳозланган.
Изоҳ (0)