“Дарё” мухбирлари марҳум актёр Шуҳрат Нуралиев хонадонида бўлиб, хотира кўрсатув тайёрлади. Ижодкорнинг фарзандлари нафақат оталари вафот этганидан кейин, ҳаётлик чоғида ҳам уни соғинишгани ва бир неча йил айро яшашганини маълум қилишди.
— Адам билан кўп ҳам кўришолмасдик. Чунки биз оилавий низолар сабаб бувимнинг уйида яшардик. Аслида адам билан онам бирор марта тортишишмаган, улар бир-бирини тушунишарди. Аввал адам ота уйида яшади, аммо кўп ўтмай алоҳида яшаётганлари ҳақида эшитдик. Адам ҳеч қачон бизни ёлғизлатиб қўймасди. Оналарини кўргани келсак, адам ҳам ота уйига келарди. Ёшликдаги қийинчиликларни гапириб, кулдириб ўтирарди.
Турмушга чиққанимдан кейин эркак кишига осон эмаслигини англаб етдим. Чунки оиланинг тарқалиб кетмаслиги кўп жиҳатдан эркакларга боғлиқ экан. Ўша пайтда вазиятни тушунмагандирман, аммо оилали бўлгач эркак киши учун онаси ва аёлини бирдек тушуниш нақадар қийин эканлигини англаяпман.
Адам аразлаб бир неча йил ота уйига ҳам келмай қўйган. Аммо шунда ҳам бувим ва амакиларимни ўйлаб, рўзғорлик қилиб таксидан бериб юборар экан. Бир куни қўнғироқ қилиб, бувимнинг уйига бормоқчи эканлигимизни айтдим. Адам ноилож рози бўлди. Бувимнинг уйига борсак, адам биздан аввалроқ келиб, подездда кутиб турган экан. Ўшанда ҳаммамиз қучоқлашиб йиғлаганмиз. Адам раҳматли “Бўлди, нима бўлса бўлди. Энди бирга яшаймиз”, деганди. Афсуски, орадан кўп ўтмай аҳволи ёмонлашди, — дейди актёрнинг тўнғич қизи Мафтуна Нуралиева.
Марҳум ижодкорнинг ҳамкасби, актриса Вазира Юнусова эса Шуҳрат Нуралиевнинг офисда яшагани ва вафотидан аввал айтган сўзлари ҳақида гапирди.
— Шуҳрат Нуралиев оиласи билан ажрашиб кетгани ҳақида эшитгандим. Офис олиб, ўша ерда ҳам ижод қиларди, ҳам яшарди. У онасини жуда яхши кўрадиган, қалқон бўлоладиган фарзанд эди. Оддий мисол, у аёлига пайпоқ олмоқчи бўлса ҳам, бозорга бизни олиб бориб, аввал онасига бошдан оёқ кийим олиб, кейин аёлига керак бўлган нарсани харид қиларди.
“Мен сендан олдин кетаман, опа”, деган гапни кўп айтарди. Ҳатто ўлимидан аввал ҳам шу ҳақда гап очганида “Сен мендан анча ёшсан, ўғлим йўқ анбаримни ўзинг кўтарасан” деганида койиб бергандим. Шуҳрат қувноқ, дардсиз инсондек кўринган бўлса-да, ичида ютиб юрганлари кўп экан. У онаси, аёли, фарзандлари ва укалари ҳақида кўп ўйларди. Болаларининг тўйини қилишни орзу қиларди, — дейди актриса Вазира Юнусова.
Эслатиб ўтамиз, Шуҳрат Нуралиев 1980 йилнинг 5 ноябрь куни Тошкент шаҳрида таваллуд топган. У собиқ Маннон Уйғур номидаги Тошкент давлат санъат институтини тамомлаган. Кино актёрлигидан ташқари, Ўзбек Миллий академик драма театрида ҳам фаолият юритган. Вафотидан аввал эса Ўзбекистон халқ артисти Юлдуз Усмонованинг жамоасида раҳбар ва режиссёр вазифасида ишлаган. Шуҳрат Нуралиев Нилуфар Усмонованинг “Асрайди”, “Кел иккимиз” каби хит қўшиқлари муаллифи ҳисобланади. Шунингдек, у Юлдуз Усмонованинг бир неча қўшиқларига клиплар суратга олган.
Изоҳ (0)