Баъзан ижтимоий тармоқларда фақат қиз фарзанд кўргани учун аёлидан ранжиган эркаклар ҳақидаги постларга кўзимиз тушиб қолади. Аммо фарзанднинг жинси кўп жиҳатдан аёлга боғлиқ эмаслиги аллақачон тиббиёт томонидан исботланган.
Ўзбек шоу-бизнеси вакиллари орасида ҳам фақат қиз фарзандни тарбиялаётган машҳурлар бисёр. Улар нолишмайди, аксинча қизларидан фахрланишади.
Муқаддас Холиқова
Ўзбекистон халқ артисти Муқаддас Холиқованинг уч нафар қиз фарзанди бор. Тўнғич қизи Оминахон банкда кадрлар бўлими бошлиғи лавозимида ишлайди. Зебинисо қизи эса актриса, Ўзбек миллий академик драма театрида фаолият юритади. Кенжа фарзанди эса уй бекаси.
Элмурод Ҳақназаров
“Дизайн” жамоаси аъзоси Элмурод Ҳақназаров ҳам уч нафар қизни вояга етказяпти. У “Дарё”га берган интервьюсида айнан уч нафар қизи бўлишини орзу қилгани ҳақида айтиб ўтган.
— Отабек Муҳаммадзоҳиднинг ҳам уч нафар қиз фарзанди ва битта ўғли бор. Уйланмасдан аввал “Менинг ҳам учта қизим бўлса, яхши тарбия бериб, эгасига топширсам” деб ният қилардим. Аллоҳ ўғил берса қувонаман, аммо қизларимнинг борига ҳам шукр қиламан. Чунки дунёда фарзандсиз инсонлар ҳам жуда кўп, — дейди Элмурод Ҳақназаров.
Юлдуз Ҳамидова
Айни кунларда АҚШда истиқомат қилаётган Юлдуз Ҳамидова ҳам уч нафар қиз фарзандни тарбиялаган. Унинг тўнғич қизи Тошкентда, Фотима ва Зуҳра исмли эгизаклари эса АҚШда яшайди. Актриса ҳам айнан эгизаклари сабаб хорижга кўчиб ўтган. Она ва болалар бир пайтда университетга қабул қилиниб, таҳсил олишмоқда.
Гулчеҳра Жамилова
Ўзбекистон халқ артисти Гулчеҳра Жамилованинг икки нафар қиз фарзанди бор.
— Ўғлим йўқ, деб ўксинмайман. Чунки Аллоҳим ўғилнинг ўрнини тўлдирадиган набиралар ато этган. Қизларим жуда меҳрибон. Катта қизим Асал хорижда яшайди, кенжам эса биз билан бирга, — дейди актриса.
Вазира Юнусова
Актриса Вазира Юнусова ҳам уч нафар қиз фарзанднинг онаси. “Дарё”га берган интервьюсида баъзи ҳолларда ўғли йўқлиги сабаб ўксиниши ҳақида айтиб ўтган.
— Ўғлим йўқ, ўлсам тобутимни ким кўтаради, деб кўп ўйлайман. Учинчи қизимни анча йил ўтиб дунёга келтиргандим. Нолишга ҳаққим йўқ, қизларим жуда меҳрибон, — дейди актриса Вазира Юнусова.
Шоҳида Исмоилова
Шоҳида ва Маҳмуд Исмоиловларнинг ҳам уч нафар қиз фарзанди бор. Актриса интервьюларининг бирида куёвлар ҳам ўғил бўла олиши ҳақида айтиб ўтганди.
— Турмуш ўртоғимнинг саломатлиги ёмонлашиб қолганида куёвлар ҳам ўғилдек бўлолишини билдим. Уч нафар куёвим ҳам ёнимизда туриб, навбати билан дадамизга қарашди. Ўғлим йўқ, деб ўксинишга ҳожат йўқ, меҳрибон куёвларим бор, —дейди актриса Шоҳида Исмоилова.
Зуҳра Ашурова
Актриса Зуҳра Ашурова ҳам икки фарзандни вояга етказган. Тўнғич қизи Мафтуна Ашурова бошловчи ва актриса сифатида фаолият кўрсатади. Кенжа фарзанди Муслима Ашурова эса отаси Қаҳрамон Ашуров каби телевидение режиссёри бўлишни маъқул кўрган. Аммо у ҳозирча иш фаолиятини бошлагани йўқ.
Изоҳ (0)