“Real Madrid” himoyachisi Raul Asensio voyaga yetmagan shaxs ishtirokidagi videoni tarqatishda gumon qilinmoqda. Ispaniyaning Gran-Kanariya orolidagi San-Bartolome de Tirajana sudi tergov boshlangani va to‘rt futbolchi, jumladan, Asensio ustidan jinoiy ish qo‘zg‘atilishi mumkinligini ma’lum qilgan. Bu haqda The New York Times nashri xabar berdi.
Videodagi harakatlar 2023-yil Gran-Kanariya oroli janubida joylashgan klubda sodir bo‘lgan. Unga ko‘ra, futbolchilar voyaga yetmagan qiz ishtirokidagi videoni ruxsatsiz yozib olib, WhatsApp orqali tarqatganlikda ayblanmoqda. Dastlab bu ishda guvoh sifatida so‘roq qilingan Asensio keyinchalik gumonlanuvchiga aylangan.
Tergovda tilga olingan boshqa uch futbolchi — Ferran Ruis, Xuan Rodriges va Andres Garsiya 2023-yil sentabr oyida qo‘lga olingan. Ularning barchasi avval “Real Madrid” yoshlar jamoasida Asensio bilan birga o‘ynagan bo‘lib, Ruis hozir “Jirona” safida, Rodriges va Garsiya esa Ispaniya 3-divizionidagi “Tarasona” va “Alkorkon” klublarida to‘p surmoqda.
Sud hujjatlariga ko‘ra, jabrlanuvchilardan biri hodisa sodir bo‘lgan payt 16 yoshga to‘lmagan bo‘lgan. Ish endi prokuraturaga topshirildi. Prokurorlar uni sudga oshirish yoki yopish bo‘yicha qaror qabul qiladi.
Hozircha na “Real Madrid” klubi, na Asensioning vakillari bu borada izoh bergan.
Klub ilgariroq e’lon qilgan bayonotda: “Mazkur holat bo‘yicha barcha faktlar aniqlangach, zarur chora-tadbirlar ko‘riladi”, deyilgan edi.
Izoh (0)