Ўзбекистон футбол ассоциациясининг навбатдаги Ҳисобот конгресси бўлиб ўтди (фотогалерея)

Ўзбекистон футбол ассоциациясининг (ЎФА) навбатдаги Ҳисобот конгресси 26 декабрь куни бўлиб ўтди. “Дарё” ушбу конгрессдан фотогалереяни тақдим этади.

Конгресс кун тартибидан ўрин олган масалалар рўйхати:

I. Ўзбекистон футбол ассоциациясининг 2022 йил 24 декабрда ўтказилган Конгресс баённомасини тасдиқлаш.

2. ЎФА нинг 2022-молиявий йил учун аудитор ҳисоботини тасдиқлаш.

3. Ўзбекистон футбол ассоциациясининг 2023, 2024 ҳамда 2025 йиллар молиявий кўрсаткичларини текширувчи мустақил аудиторлик ташкилотни тасдиқлаш.

4. Ўзбекистон футбол ассоциацияси фаолияти тўғрисида ҳисобот.

Тадбирнинг иккинчи қисмида жорий йилги футбол мавсумининг энг яхшиларини тақдирлаш маросими бўлиб ўтди. 

Аббосбек Файзуллаев – Ўзбекистоннинг 2023 йилдаги энг яхши футболчиси бўлди. Аббос айни вақтда терма жамоа билан БААдаги йиғинда иштирок этаётгани учун совринни унинг отаси қабул қилиб олди.

Ўзбекистон аёллар терма жамоаси ҳамда “Севинч” клуби етакчиси Людмила Карачик “Йилнинг энг яхши аёл футболчиси” совринини қўлга киритди.

Ўзбекистон мезбонлик қилган U-20 Осиё Кубогида жамоаси билан биргаликда ғолибликни қўлга киритган мутахассис Равшан Ҳайдаров — “Йилнинг энг яхши мураббийи” совринига лойиқ деб топилди.

20 ёшгача бўлган футболчилар ўртасидаги Осиё кубоги соҳиби, ёшлар ўртасидаги Жаҳон чемпионати иштирокчиси, Ўзбекистон U-20, U-23 ва миллий терма жамоаларида ишончли ўйин кўрсатиб келаётган иқтидор эгаси — Абдуқодир Ҳусанов “Йилнинг энг яхши ёш футболчиси” совринига лойиқ деб топилди. 

“Сўғдиёна” етакчиси Диёра Ҳабибуллаева кетма-кет учинчи мавсум Олий лиганинг энг яхши тўпурарига айланмоқда. Жорий йилга келиб Диёра чемпионат доирасида рақиблари дарвозасига 61 та тўп киритишга муваффақ бўлди.

“Севинч” клуби вакиласи Умида Зоирова “Аёллар Олий лигасида йилнинг энг яхши футболчиси” совринини қўлга киритди.

Ўзбекистон футзал миллий терма жамоаси етакчиларидан бири, ўтган мавсум чемпиони Ҳусниддин Нишонов “Йилнинг энг яхши футзалчиси”  совринини қўлга киритди.

Ўтган мавсумда “БМБ” футзал жамоаси билан биргаликда мавсум чемпионлигини қўлга киритган мутахассис — Нодир Элибоев мазкур совринига лойиқ деб топилди.  

Тадбир давомида Индонезияда ўтказилган 17 ёшгача бўлган футболчилар ўртасидаги Жаҳон чемпионатида муносиб иштирок этган, дунёнинг энг кучли 8 жамоаси қаторидан ўрин олган Ўзбекистон U-17 терма жамоаси ҳам тақдирланди.

Ўзбекистон футбол ассоциацияси Осиё футбол кофедерацияси томонидан 2023 йилнинг “Энг яхши ассоциацияси” деб топилди. Шунингдек, Ўзбекистондаги спорт ташкилотлари орасида эса “Йилнинг энг яхши спорт федерацияси” дея эътироф этилганди.

Шу муносабат билан мазкур совринлар ЎФА президенти Абдусалом Азизовга топширилди. 

ЎФА президенти Абдусалом Азизов тадбир якунида бир қатор масалалар юзасидан фикр билдириб ўтди:

2023 йилда бутун жамоа, ЎФА, ПФЛ, Ҳакамлар маркази, Терма жамоалар бош мураббийлари, футболчилар, умуман барча мутахассислар меҳнат қилди ва бунинг натижасини кўриб турибмиз. Лекин янги йилда олдимизда масъулиятли вазифалар бор. 

Терма жамоалар маркази замонавий стандартлар асосида ташкил этилмоқда. Барча жамоаларимиз мазкур базада ўқув-йиғин машғулотларини ўтказиш этиш имконига эга бўладилар. 

Миллий терма жамоа Осиёда ўзини кўрсатадиган пайт келди. Бунга барча шароитлар етарли ва биз футболчи-мураббийларимизга ишонамиз. 

Бундан ташқари, аёллар ва Ўзбекистон U-23 терма жамоамиз янги йилда Париж Олимпиадасига йўлланма олиш учун ҳаракат қилишади. 

Футзал бўйича Жаҳон чемпионати юртимизда ўтади. Уни юқори савияда ўтказиш бўйича ҳам олдимизда қиладиган ишларимиз кўп.

Ўтган мусобақалар, Жаҳон чемпионатлари шуни кўрсатдики, ёшларга қанча имконият берсак, болаларимизни қўллаб-қувватласак — юртимиздан ҳали кўплаб иқтидорли футболчилар етишиб чиқади, биз бунга ишонамиз. 

Барча клублар маблағларни тўғри тақсимлаш, эртанги кун ривожига ажратиш бўйича тўғри йўлдан бориши талаб этилади. Келишилган ўйинларга қарши курашиш бўйича ишларни жадал давом эттирамиз. 

Умуман олганда, барчамиз биргаликда меҳнат қилиб, Ўзбекистонда футболни янги босқичга олиб чиқиш учун тинмай ҳаракат қилишимиз керак.