Navoiy viloyati Qiziltepa tumanida ayol hujjatlarda erkak sifatida qayd etilgani aniqlandi. Bu haqda “Davr” dasturida xabar berildi.
Unda aytilishicha, Qiziltepa tumanida yashovchi Erkinoy Tilavova pensiya yoshiga yetgach, zarur hujjatlarni rasmiylashtirish jarayonida o‘zining tug‘ilganlik guvohnomasida ism va jinsi noto‘g‘ri ko‘rsatilganini aniqlagan. Rasmiy ma’lumotlarga ko‘ra, guvohnomada uning ismi Erkin deb yozilgan bo‘lib, jinsi erkak sifatida qayd etilgan.
Erkinoy Tilavovaning aytishicha, bu xatolik shu paytgacha e’tiborga olinmagan.
Pensiyaga chiqish uchun hujjat tayyorlab yurgandim, arxivdan Tilavov Erkin chiqdi. “Metrika”ngiz chalkash deyishdi. Shu paytgacha hujjatlarga ishim tushmagandi, deydi u.
Qiziltepa tumani FHDY bo‘limi mudirasi Marusa Nosirovaning bildirishicha, mazkur noto‘g‘ri yozuv asosida fuqarolik pasporti ham olingan.
Biz elektron tizim va Erkinoy Tilavova qo‘lidagi hujjatlarni taqqoslab ko‘rganimizda fuqaroning tug‘ilish dalolatnoma yozuvlarida erkak jinsli farzand tug‘ilgani, familiyasi Tilavov va ismi Erkin ekani to‘g‘risida ma’lumotlar yozilgani aniqlandi. Hujjatga ota-onaning o‘zlari tuzatish kiritib qo‘yishgan va bu bilan fuqarolik pasporti olingan. Bugungi kunda elektron tizim bo‘lgani sababli muammoga duch kelishgan, dedi Nosirova.
Mazkur holat yuzasidan Qiziltepa tumani Adliya bo‘limi tomonidan FHDY bilan hamkorlikda sudga murojaat qilinib, fuqarolik faktini aniqlashtirish bo‘yicha da’vo arizasi kiritilgan.
Tegishli tashkilotlar ayolga huquqiy yordam ko‘rsatmoqda va masala qonuniy tartibda hal etilishi kutilmoqda.
Ma’lumot uchun, agar hujjatda ism yoki jins noto‘g‘ri ko‘rsatilgan bo‘lsa:
Fuqarolik holati dalolatnoma yozuvlariga o‘zgartirish kiritish bo‘yicha ariza topshiriladi
FHDY bo‘limiga yozma ariza bilan murojaat qilinadi.
Ariza bilan birga hujjatlar (pasport, mavjud guvohnoma, tibbiy ma’lumotnoma, guvohlarning ko‘rsatmalari va h.k.) topshiriladi.
FHDY ariza va hujjatlar asosida tahlil qiladi.
Zarur holatlarda sud orqali hal etiladi
Agar tuzatish oddiy tartibda amalga oshirib bo‘lmasa yoki hujjatlar qarama-qarshi bo‘lsa, FHDY fuqaroga fuqarolik holati faktini aniqlash bo‘yicha sudga murojaat qilishni tavsiya qiladi. Bu holda:
sudda ism/jins noto‘g‘ri yozilgani isbotlanadi (guvohlar, dalillar orqali).
sud qarori asosida FHDY rasmiy o‘zgartirish kiritadi va yangi guvohnoma beradi.
Izoh (0)