ЎФА тартиб-интизом қўмитаси қарорлари: «Навбаҳор» мухлисларнинг номақбул ҳаракатлари учун жаримага тортилди, «Бунёдкор» легионери 2 ўйинга четлатилди

Ўзбекистон футбол ассоциацияси (ЎФА) тартиб-интизом қўмитасининг навбатдаги йиғилишидан кейин бир қатор қарорлар эълон қилинди.

• Суперлига 2-тури доирасидаги «Андижон» — «Сурхон» учрашуви якунланганидан сўнг икки жамоа футболчилари ўртасида келишмовчилик юзага келган пайтда «Сурхон» клуби бош мураббийи Рифат Аккомхўжаев ўзини нопрофессионал тарзда тутиб, рақиб жамоа мураббийларидан бирини туртиб юборгани учун унга нисбатан жарима интизом чораси қўлланилди. Шунингдек, ушбу учрашув якунланганидан сўнг икки жамоа футболчилари ўртасида келишмовчилик юзага келган пайтда «Андижон» жамоаси футболчиси Суннатилло Ҳамиджонов «Сурхон» клуби бош мураббийи Рифат Акромхўжаевга нисбатан жуда қўпол муносабатда бўлиб, ўзини нопрофессионал тарзда тутгани футболчига нисбатан жарима интизом чораси қўлланди.
• Суперлига 3-тури доирасидаги «Бунёдкор» — «Андижон» учрашувининг 36-дақиқасида мезбонлар футболчиси Иброҳим Томива оёғининг таг қисми билан рақиб футболчисининг кўкрак қисмига кучли зарба бергани учун 2 та ўйинга дисквалификация қилинди ва унга жарима интизом чораси қўлланди.
• Суперлига 3-тури доирасидаги «Навбаҳор» — «Насаф» учрашувининг 51-дақиқасида «Навбаҳор» мухлислари ўз норозилигини қўпол тарзда намойиш этиб, «Насаф» футболчилари ва ўйин расмийлари томон майдонга турли буюмлар улоқтирган. Шу сабабли «Навбаҳор» футбол клубига нисбатан жарима интизом чораси қўлланилди ва агар бундай ҳолат яна такрорланса, клуб уй учрашувини мухлисларсиз ўтказиши бўйича огоҳлантирилди.
• U-21 Биринчилиги 2-тури доирасида «Қўқон-1912» — «Қизилқум» учрашувининг 16-дақиқасида «Қизилқум» футболчиси Шаҳзод Туропов ўйин расмийлари шаънига ҳақоратли сўзлар ишлатгани учун 3 та ўйинга дисквалификация қилинди ва унга жарима интизом чораси қўлланилди.
• Про-Лига 2-тури доирасидаги «Олимпик» — «Оқтепа» учрашуви якунланганидан сўнг «Оқтепа» клуби маъмури Бахтиёр Эргашев ўйин расмийлари шаънига номақбул сўзлар ишлатгани учун унга нисбатан 2 та ўйинга дисквалификация қилиш ва жарима интизом чораси қўлланди. Шунингдек, мазкур учрашувдан сўнг «Оқтепа» клуби директори Алишер Шоғуломов ҳакамликдан норозилиги бўйича ўйин протоколига ёзма ариза ёзмай туриб, бунинг ўрнига ОАВ орқали ўз норозилигини билдиргани учун жарима интизом чораси қўлланилди.
• Про-Лига 2-тури доирасидаги «Арал» — «Хоразм» учрашуви якунланганидан сўнг «Арал» жамоаси мухлислари ўз норозилигини қўпол тарзда намойиш этиб, майдонга турли буюмлар улоқтирган. Агар бундай ҳолат яна такрорланса, клуб уй учрашувини мухлисларсиз ўтказиши бўйича огоҳлантирилди. Шунингдек, «Арал» бош мураббийи Темур Турдиев ҳакамликдан норозилиги бўйича ўйин протоколига ёзма ариза ёзмай туриб, бунинг ўрнига ОАВ орқали ўз норозилигини билдиргани учун жарима интизом чораси қўлланди.