Хоразм вилояти Урганч шаҳридаги банкларнинг бирида ёнғин чиқди. Бу ҳақда вилоят ФВБ хабар берди.
Келтирилишича, 25 сентябрь куни соат 11:05 да Урганч шаҳар, “Навбаҳор” МФЙ, Тинчлик кўчасида жойлашган банкларнинг бири биносининг ижарага берилган юқори қисмида ёнғин содир бўлгани тўғрисида ФВБга хабар тушган.
Ёнғин-қутқарувчилар соат 11:10 да ҳодиса жойига етиб бориб, соат 11:30 да ёнғин ўраб олинган ва соат 12:22 да ўчирилган. Ҳодиса натижасида бино том қисмининг тахминан 30 кв/м майдони ёниб зарарланган.
Ёнғинни бартараф этишга 4 та ёнғин-қутқарув экипажи ва 1 та автонарвон жалб этилган. Тан жароҳати олган ва ҳалок бўлганлар йўқ. Ҳозирда ёнғин сабаби ва моддий зарар миқдори аниқланмоқда.
Аввалроқ Сурхондарёда бешта савдо дўконида ёнғин содир бўлгани, Тошкентдаги автосервисда 3 та автомобиль ёниб кетгани, “Космонавтлар” метро бекати яқинида ерости кабели ёнгани тўғрисида хабар берилганди. Шунингдек, Тошкентдаги “Чорсу” бозорида ёнғин чиққан эди. Шаҳар ва туман ҳокимликлари вакиллари ёнғиндан зарар кўрган тадбиркорлар билан учрашган.
Изоҳ (0)