Шри-Ланка ҳукумати Россиянинг Украина урушида мамлакатнинг 16 нафар фуқароси ҳалок бўлганини маълум қилди. Бу ҳақда мамлакат Мудофаа вазирлиги баёнотига асосланиб, The Moscow Times нашри хабар берди.
Шри-Ланка Мудофаа вазирлиги ушбу ҳолат ҳақида 15 май куни маълум қилган. Аҳоли орасида руслар учун ёлланма аскарликка кетаётганлар сони кўпаяётгани айтилган.
Манбада айтилишича, мамлакат полицияси фуқароларни урушга жалб қилишга ҳаракат қилаётган гуруҳларни аниқлаш учун суриштирув бошлаган. Ҳозирга қадар камида 288 нафар Шри-Ланка фуқароси урушга ёлланиб, мамлакатни тарк этгани аниқланган.
“Биз ҳалок бўлган 16 киши ҳақидаги маълумотни аниқладик”, — деган Шри-Ланка мудофаа вазири ўринбосари Прамитҳа Теннакун пойтахт Коломбода журналистлар билан суҳбатда.
Мамлакатдаги ҳукмрон партия депутати Гамини Валебода ёлланма аскарларнинг аксарияти Россия армияси сафида жанг қилиш учун кетганини билдирган. Олий раҳбарият эса бу борада ҳеч қандай изоҳ бермаган.
Полиция расмийлари фуқаролар катта пул ваъда қилиш эвазига урушга чақирилганини маълум қилган. Шу каби ҳолатлар қўшни Ҳиндистон ва Непалда ҳам кузатилган.
“Бу жуда нозик масала. Биз Россия билан ҳам, Украина билан ҳам дўстмиз. Иккала мамлакат ҳам биз учун муҳим. Айни дамда биз Россия ва Украина Ташқи ишлар вазирликлари билан фуқароларимизни хавфсиз қайтариб келиш борасида гаплашмоқдамиз”, — деган мудофаа вазирлиги расмийси Прамитҳа Теннакун.
Изоҳ (0)