Шри-Ланка ҳукумати Россия-Украина урушида қатнашаётган фуқаролар сонини 280 киши деб ҳисобламоқда. Бу ҳақда AFP хабар берди.
“Биз 280 га яқин оила аъзоларидан шикоятлар олдик”, деди мамлакат жамоат хавфсизлиги вазири Тиран Аллес AFP’га берган интервьюсида. Улардан қанчаси можаро ҳудудида ҳалок бўлгани номаълум.
Ўтган ҳафта Мудофаа вазирлиги махсус бўлинма ташкил қилганидан сўнг ёлланма аскарларнинг қариндошларидан хабарлар кела бошлади. Шри-Ланка депутати Гамини Валебоданинг айтишича, ёлланма аскарларнинг аксарияти алдов йўли билан ёлланган: уларга юқори маош ва логистика касблари ваъда қилинган.
Шри-Ланкаликларнинг чет элга чиқишида ҳеч қандай чекловлар йўқ ва аҳолининг катта қисми 2022 йил ўрталарида мисли кўрилмаган иқтисодий инқироздан кейин бошқа мамлакатларга ишлаш учун кетган. Шу билан бирга, Шри-Ланка ўз фуқароларини ҳарбий ҳаракатларда қатнашиш учун Россия ёки Украинага боришдан бир неча бор огоҳлантирган.
Жорий йилда Шри-Ланка полицияси икки истеъфодаги армия зобитини, жумладан, генерал майорни Россия ёлланма фирмалари учун фуқароларни ноқонуний ёллагани учун ҳибсга олди, деб ёзади AFP.
Изоҳ (0)