Наманганда Jazeera Airways авиакомпанияси мутасаддиларининг вилоятдаги туризм компаниялари ва агентликлари вакиллари билан учрашуви бўлиб ўтди. Бу ҳақда «Дарё» мухбири Азизбек Абдувалиев хабар бермоқда.
Наманган халқаро аэропорти маъмурияти ташаббуси билан вилоят туризм ва маданий мерос бошқармаси ҳамкорлигида ташкилланган тадбирда Jazeera Airways авиакомпанияси томонидан кўрсатилаётган хизматлар ва амалга оширилаётган йўналишлар ҳақида батафсил маълумот берилди.
Jazeera Airways авиакомпанияси вакили Илдар Абубакировнинг маълум қилишича, ҳозирда Наманган—Кувайт—Наманган йўналишида доимий рейсларни йўлга қўйиш масаласи кўриб чиқилмоқда.
Ушбу авиарейсларни жорий йил август ойидан бошлаб ҳафтасига икки маротаба амалга ошириш режалаштирилмоқда. Талаб ва эҳтиёждан келиб чиқиб, уларнинг сони кўпайтирилиши ёки аксинча камайтирилиши мумкин.
«Мазкур йўналиш Наманган, умуман, водий аҳолисига Форс кўрфази давлатларига саёҳат қилиш учун имконият яратади. Қолаверса, умра сафарини амалга ошириш истагидаги зиёратчилар учун ҳам ўзига хос қулайликлар туғдиради», — дейди Илдар Абубакиров.
Маълумот учун, Jazeera Airways Кувайт миллий авиакомпанияси бўлиб, 2004 йилдан бери Покистон, Ҳиндистон, Шри-Ланка, Непал, Яқин Шарқ ва Европа давлатларига парвозларни амалга ошириб келмоқда. Jazeera Airways 2021 йили Кувайт—Тошкент йўналиши бўйича рейсни ҳам йўлга қўйганди.
Изоҳ (0)